Byggðastofnun veitir langtímalán til fjárfestinga, hagræðingar og fjárhagslegrar endurskipulagningar fyrirtækja á landsbyggðinni. Fyrirtækjum á landsbyggðinni bjóðast ekki alltaf jafn hagstæðir og fjölbreyttir möguleikar á fjármögnun og fyrirtækjum á höfuðborgarsvæðinu. Sérstaklega á þetta við minni fyrirtæki og á fámennari stöðum. Því er lánastarfsemi Byggðastofnunar valkostur í fjármögnun sem stuðlar að hagstæðari lánskjörum og lánsframboði fyrir atvinnulíf landsbyggðarinnar.
Lánstími getur verið frá 6-20 ár en algengast er 10-15 ár. Veð eru tekin í þeirri fasteign eða skipi sem lánað er til. Meginreglan varðandi fasteignir er að veðstaða lánsins verði ekki hærri en 75% af áætluðu söluverði fasteignarinnar. Veðstaða í skipum skal að jafnaði ekki vera hærri en 60% af markaðsverði skips með aflaheimildum. Ekki er lánað til aflaheimildalausra skipa og báta.
Lánsumsókn og leiðbeiningar fyrir lánsumsókn eru hér fyrir neðan á Word formi. Hægt er að senda útfyllta lánsumsókn með tölvupósti (athugið að nota þarf músina til að fara á milli lína í textareitum) eða prenta út og senda með hefðbundnum hætti. Eftir að lánsumsókn hefur borist stofnuninni er umsækjanda send staðfesting á móttöku hennar. Mikilvægt er að láta fylgja með þau gögn sem óskað er eftir á umsóknareyðublaðinu.
Lán eru verðtryggð með 6,4% vöxtum.