Fréttir

Merki NORA

Norræna Atlantshafssamstarfið, NORA, styrkir samstarf á Norður-Atlantshafssvæðinu og veitir verkefnastyrki tvisvar á ári. Nú óskar NORA eftir styrkumsóknum með umsóknarfrest mánudaginn 13. mars 2017.

NORA veitir styrki að hámarki 500.000 danskar krónur á ári og mest til þriggja ára. Skilyrði er að þátttaka sé frá a.m.k. tveimur NORA-löndum, en aðildarlönd eru Ísland, Grænland, Færeyjar og strandhéruð Noregs.

Umsóknir skulu taka mið af skipulagsáætlun NORA 2017-2020 og taka til eftirfarandi þátta:

• Skapandi greinar. Þar er átt við verkefni sem byggja á hugviti, hæfileikum og sköpunarkrafti og eru atvinnuskapandi.
• Græn orka. Grænar lausnir í orkumálum til lands og sjávar.
• Líf-hagkerfi (bioøkonomi). Nýsköpun og þróun sem snertir fullnýtingu afurða og sjálfbærni í matvælaframleiðslu.
• Sjálfbær ferðaþjónusta. Stuðli að fjölbreytni í viðkvæmu hagkerfi og að sjálfbærni.
• Upplýsingatækni. Mikilvægt mál til að sigrast á fjarlægðum.
• Velferðarþjónusta. Samstarf á svæðinu til að auka þjónustu í dreifðum byggðum.
• Öryggi á hafinu. Aukin skipaumferð um Norður-Atlantshaf kallar á ný úrlausnarefni.

Yfirlýst markmið í stefnumörkun áranna 2017-2020 er að stuðla að því að Norður-Atlantshafssvæðið og heimskautssvæðið verði aðlaðandi til búsetu. NORA leggur sérstaka áherslu á annars vegar fjölbreytni í atvinnulífi sem byggist á nýsköpun og hins vegar sjálfbæra þróun í samfélögum svæðisins.

Fræðast má nánar um skipulagsáætlun NORA 2017-2020 á heimasíðunni, www.nora.fo

Á heimasíðu NORA er að finna leiðbeiningar um umsóknarferilinn undir valtakkanum „Guide til projektstøtte“. Umsóknareyðublaðið er einnig að finna á heimasíðu NORA og senda á umsóknina rafrænt til NORA á netfangið noraprojekt@nora.fo .

Nánari upplýsingar og ráðgjöf má fá hjá tengilið NORA á Íslandi sem er: Sigríður K. Þorgrímsdóttir, Byggðastofnun, s. 455 5400 og netfang sigga@byggdastofnun.is