Fréttir

Laufey Kristín Skúladóttir

Laufey Kristín Skúladóttir hefur verið ráðin í starf sérfræðings á þróunarsviði Byggðastofnunar. Starfið var auglýst í byrjun janúar og rann umsóknarfrestur út þann 28. janúar. Alls barst 21 umsókn um starfið en einn aðili dró umsókn sína til baka. 8 konur sóttu um starfið og 13 karlar.

Laufey er með MSc gráðu í stjórnun nýsköpunar og viðskiptaþróunar frá Copenhagen Business School og BA gráðu í hagfræði með heimspeki sem aukafag frá Háskóla Íslands.

Laufey hefur starfað hjá Fisk-Seafood, þar sem hún var markaðs- og sölustjóri. Þar áður starfaði hún sem verkefnastjóri hjá Sveitarfélaginu Skagafirði og sem atvinnuráðgjafi hjá SSNV. Hún er fulltrúi í sveitarstjórn í Sveitarfélaginu Skagafirði.

Laufey er gift Indriða Þór Einarssyni verkfræðingi og eiga þau þrjár dætur.

Verkefnin verða fjölbreytt, en á meðal helstu verkefna Laufeyjar verður að vinna við undirbúning og gerð byggðaáætlunar og vinna við greiningar á þróun byggðar á lands- og landshlutavísu með tilliti til byggðaáætlunar og sóknaráætlana landshluta.

Laufey mun hefja störf á næstunni.