Fréttir

Þéttbýlisstaðir

Byggðastofnun hefur nú í ár líkt og undanfarin ár, fengið Þjóðskrá Íslands til að reikna út fasteignamat og fasteignagjöld á sömu viðmiðunarfasteigninni á 26 þéttbýlisstöðum á landinu. Eru nú til árleg og sambærileg gögn frá árinu 2010 til ársins 2018. Sjá má staðsetningar þessara þéttbýlisstaða hér á meðfylgjandi mynd.

Fasteignagjöldin eru reiknuð út samkvæmt núgildandi fasteignamati sem gildir frá 31. desember 2017 og samkvæmt álagningarreglum ársins 2018 eins og þær eru í hverju sveitarfélagi.

Heildarmat, sem er samanlagt verðmat fasteignar og lóðar, er mjög mismunandi eftir því hvar á landinu er. Til að mynda er heildarmat nú á viðmiðunarsvæðum í Reykjavík frá 46 m.kr. upp í 99 m.kr. Lægsta heildarmat undanfarin ár hefur verið ýmist á Patreksfirði, Vopnafirði eða Bolungarvík. Matið á Vopnafirði er nú 16,95 m.kr. en var 15,2 m.kr. í fyrra og á Patreksfirði er það nú 16,05 m.kr. en var 14,5 m.kr. Er Bolungarvík nú annað árið í röð með lægsta heildarmatið 14,5 m.kr. en í fyrra var matið þar 14,45 m.kr.

Af þeim þéttbýlisstöðum sem skoðaðir voru, utan höfuðborgarsvæðisins, er matið hæst á Akureyri 42,15 m.kr. Matið þar hefur hækkað um 12,4% á milli ára en það var 37,5 m.kr. árið áður. Heildarmat hækkaði mest á Húsavík á milli áranna 2017 – 2018 eða um 43%, úr 22 m.kr. í rúmar 31 m.kr. Þá hækkaði matið í Grindavík um 19,3%, fór úr rúmum 25 m.kr. í rúmar 30 m.kr. Lægsta heildarmatið er í Bolungarvík, 65 þ.kr. lægra en það er á Patreksfirði og 295 þ.kr. lægra en á Seyðisfirði. Í Bolungarvík hækkaði matið um 0,3% á milli ára. Það var aðeins á Hólmavík þar sem matið lækkaði á milli ára, um 2,9%, úr 16,73 m.kr. í 16,25 m.kr.

Mesta hækkun fasteignagjalda á milli ára var á Höfn um 15,1% eða 46 þ.kr. Þar á eftir er Sauðárkrókur með 14% hækkun eða 43 þ.kr. Gjöldin lækka á Akranesi um 8,21% eða um 25 þ.kr. en á Hólmavík standa gjöldin nánast í stað á milli ára. Í Keflavik hækka gjöldin um rúmar 2 þ.kr.

Skýrslan hefur verið uppfærð frá því að fréttin birtist fyrst.

Sjá má frekari upplýsingar í meðfylgjandi skýrslu