Fréttir

Frá afhendingu Eyrarrósarinnar 2015

Eyrarrósin 2015 var afhent við hátíðlega athöfn um borð í Húna við Ísafjarðarhöfn síðastliðinn laugardag. Í ár var það Frystiklefinn á Rifi sem hlaut Eyrarrósina en Frystiklefinn á Rifi er menningarmiðstöð, listamannaaðsetur og farfuglaheimili þar sem haldnir eru menningar- og sögutengdir viðburðir allt árið. Markmið Frystiklefans er að stuðla að auknu framboði og fjölbreytni í menningarlífi á Vesturlandi, auka þátttöku bæjarbúa og gesta í menningar- og listviðburðum og að varðveita, nýta og miðla sagnaarfi Snæfellinga. Eyrarrósinni fylgja hæstu peningaverðlaun sem veitt eru menningarverkefni hér á landi, 1,65 milljónir króna. Tvö önnur verkefni voru tilnefnd í ár; Listasafn Árnesinga í Hveragerði og Sköpunarmiðstöðin Stöðvarfirði. Hljóta þau 300 þúsund króna verðlaun auk flugmiða frá Flugfélagi Íslands.

Það var Dorrit Moussiaeff forsetafrú sem afhenti Kára Viðarssyni, eiganda og framkvæmdastjóra Frystiklefans verðlaunin en hún er verandi Eyrarrósarinnar. Gísli Halldórsson, bæjarstjóri á Ísafirði, ávarpaði samkomuna sem og Hanna Styrmisdóttir, listrænn stjórnandi Listahátíðar.

Áhöfnin á Húna, sem hlaut Eyrarrósina á síðasta ári, flutti svo nokkur lög við góðar undirtektir gesta. 

Eyrarrósin er veitt árlega framúrskarandi menningarverkefni á starfssvæði Byggðastofnunnar. Markmið hennar er að beina sjónum að og hvetja til menningarlegrar fjölbreytni, nýsköpunar og uppbyggingar á sviði menningar og lista.Þetta er í ellefta sinn sem viðurkenningin er veitt, en að verðlaununum standa Byggðastofnun, Flugfélag Íslands og Listahátíð í Reykjavík.