Byggðaáætlun 2006-2009
Þann 3. júní 2006 samþykkti Alþingi ályktun um stefnumótandi byggðaáætlun fyrir árin 2006 til 2009. Ályktunin felur í sér markmið, áherslur og 23 aðgerðartillögur til þess að ná settum markmiðum. Í henni segir m.a.: Með byggðaáætluninni verði stefnt að því að bæta búsetuskilyrði á landsbyggðinni og efla samkeppnishæfni landsins. Eftirfarandi meginmarkmið verði lögð til grundvallar:
- Að landshlutakjarnar verði efldir en jafnframt hugað sérstaklega að leiðum til þess að treysta búsetu í þeim byggðarlögum sem glímt hafa við viðvarandi fólksfækkun.
- Að byggðarlög nái að laga sig að örri samfélagsþróun og hröðum breytingum á atvinnuháttum.
- Að atvinnulíf, menntun, menning og félagslegt jafnræði verði styrkt á landsbyggðinni.
Sérstök áhersla verði lögð á gildi menntunar og menningar, aukna nýsköpunar- og atvinnuþróunarstarfsemi, bættar samgöngur og fjarskipti og styrkingu landshlutakjarnanna Akureyrar, Ísafjarðar og Miðausturlands og annarra mikilvægra atvinnu- og þjónustumiðstöðva á landsbyggðinni.
Á gildistíma byggðaáætlunar skulu stjórnvöld hafa þrjú meginatriði að leiðarljósi:
- Að stórefla menntun á landsbyggðinni.
- Að fjölga opinberum störfum á landsbyggðinni.
- Að efla Byggðastofnun og gera henni kleift með framlögum í fjárlögum að sinna mikilvægum verkefnum á sviði byggðamála.
Lesa má áætlunina í heild með því að smella hér.
Einnig má lesa nefndarálit iðnaðarnefndar Alþingis um þingsályktunartillögu um byggðaáætlun 2006-2009 með því að smella hér.
Skýrslu um ástand og horfur, byggðaáætlanir og byggðaaðgerðir má nálgast með því að smella hér.
