Lánveitingar
Sérfræðingar á fyrirtækjasviði veita ráðgjöf varðandi lánveitingar í síma 455-5400.
Byggðastofnun veitir langtímalán til fjárfestinga fyrirtækja á starfssvæði stofnunarinnar. Lánastarfsemi Byggðastofnunar er valkostur í fjármögnun sem stuðlar að hagstæðum lánskjörum og lánsframboði fyrir lítil og meðalstór fyrirtæki í landsbyggðunum.
Stjórn Byggðastofnunar setur almennar reglur um lánakjör stofnunarinnar. Markmið lánastarfseminnar er m.a. að tryggja fyrirtækjum í landsbyggðunum aðgang að langtímalánum á sem hagstæðustu kjörum, stuðla að vexti fyrirtækja, nýsköpun í atvinnulífi og eflingu byggðanna.
Áður en samningssambandi er komið á við viðskiptamann, eða áður en viðskipti eiga sér stað skal Byggðastofnun framkvæma einfaldaða áreiðanleikakönnun í samræmi við áhættumat stofnunarinnar, reglur um peningaþvætti og lög nr. 140/2018.
Byggðastofnun leggur áherslu á vandaða vinnu við lánshæfismat og áhættugreiningu. Í því skyni gerir stofnunin skilgreindar kröfur um upplýsingar, gögn og áætlanir frá viðskiptamönnum. Við mat á umsókn hefur lánanefndin til viðmiðunar rekstur og rekstrarhorfur fyrirtækis, fjárhagsstöðu, reynslu og þekkingu fyrirsvarsmanna þess, tryggingar fyrir lánum, nýsköpunargildi, samkeppnissjónarmið og gildi fyrir uppbyggingu atvinnulífs á landsbyggðunum.
Lánanefnd er skipuð er forstjóra og forstöðumönnum sviða.
Allir umsækjendur fá skriflegt svar og þar geta komið fram tiltekin skilyrði fyrir lánveitingu. Telji umsækjandi að ákvarðanir lánaefndar samrýmist ekki starfsreglum getur hann skotið máli sínu til stjórnar stofnunarinnar.
Lánsumsókn skal senda í gegn um þjónustugátt. Eftir að lánsumsókn hefur borist stofnuninni er hægt að sjá málsnúmer og stöðu máls inni í þjónustugátt. Mikilvægt er vanda umsókn og þau fylgigögn sem send eru með umsókn.
Veð eru tekin í fasteignum, skipum, hlutabréfum og lausafé. Jafnframt er Byggðastofnun heimilt að taka veð í rekstrarleyfum, einkaleyfum og vörumerkjum ef slíkar tryggingar eru í boði og veðsetning þeirra heimil samkvæmt lögum. Ekki er tekið veð í íbúðarhúsnæði nema því aðeins að það sé nýtt í beinum tengslum við atvinnurekstur umsækjanda. Veðsetningarhlutföll eru misjöfn á mili lánaflokka.
