Bíldudalur
Bíldudalur – samtal um framtíðina
Bíldudalur er við sunnanverðan Arnarfjörð og stendur við Bíldudalsvog sem gengur inn af firðinum. Norðan megin við voginn er Bíldudalsfjall og sunnan Otradalsfjall, oft nefnt Bylta af heimamönnum. Bíldudalur var verslunarstaður fyrr á tíð, á tímum einokunarverslunarinnar, en þegar verslun var gefin frjáls í lok 18. aldar eignaðist Ólafur Thorlacius verslunina og rak þaðan þilskipaútgerð og flutti fisk til Spánar. Pétur J. Thorsteinsson rak einnig útgerð og verslun á Bíldudal í kringum aldamótin 1900 og á þeim tíma myndaðist þorpið.
Á Bíldudal, sem er hluti af Vesturbyggð, hafði íbúum fækkað um árabil og nam fækkunin rúmum 40% á ellefu árum, frá 2000 til 2011, en þá voru þeir 187. Sú þróun hefur verið að snúast við allra síðustu ár, með bjartari horfum í atvinnulífi staðarins. Íbúar eru 232 m.v. 1. janúar 2016.
Á Bíldudal er næg atvinna og miklar breytingar hafa orðið vegna starfsemi laxeldisfyrirtækisins Arnarlax, en þar starfar fjöldi íbúa byggðarlagsins. Starfsemi fyrirtækisins hefur aukist jafnt og þétt allt frá árinu 2012 og er nú orðin stærsti vinnuveitandi staðarins. Auk þess hefur starfsemi Íslenska Kalkþörungafélagsins verið kjölfesta í atvinnulífi staðarins. Verksmiðja félagsins hefur stækkað auk þess sem meiri fullvinnsla hefur skapað aukin verðmæti. Hafkalk er sprotafyrirtæki sem vinnur m.a. fæðubótarefni úr afurðum verksmiðju Íslenska Kalkþörungafélagsins, vörur fyrirtækisins hafa m.a. hlotið vottun frá vottunarstofunni Tún um framleiðslu náttúruvara.
Samtal við íbúana á vegum verkefnisins Brothættra byggða hófst með íbúaþingi í september 2013. Verkefnið á Bíldudal hlaut heitið „Bíldudalur – samtal um framtíðina“. Var íbúaþingið mjög vel sótt. Nokkrir íbúafundir hafa verið haldnir síðan, til að kynna framgang verkefnisins. Var sá síðasti haldinn í apríl 2016, þar sem gerð var grein fyrir þeirri niðurstöðu að verkefnisstjórnin myndi starfa út árið 2016 og verkefninu þá ljúka formlega.
Alls voru 15 málaflokkar til umræðu á íbúaþinginu. Þátttakendur töldu húsnæðismál, heilbrigðisþjónustu, samgöngur og íþrótta- og æskulýðsmál vera mikilvægustu málaflokkana. Áform um uppbyggingu vegna fyrirhugaðs laxeldis skapa væntingar sem lituðu umræðu íbúaþingsins, enda að mörgu að hyggja. Einnig var talsvert rætt um möguleika í ferðaþjónustu, um félagslíf bæjarins og um samstarf og samstöðu í samfélaginu.
Veittir eru verkefnastyrkir á vegum Brothættra byggða til þróunarverkefna og annarra samfélagseflandi verkefna á þeim svæðum sem taka þátt. Á Bíldudal hlutu níu verkefni styrk að samtals 12.000.000 kr.
Í verkefnisstjórn sátu: Ásthildur Sturludóttir sveitarstjóri, Aðalsteinn Óskarsson, framkvæmdastjóri Fjórðungssambands Vestfjarða, Shiran Þórisson, framkvæmdastjóri AtVest, Ása Dóra Finnbogadóttir f.h. íbúa og loks Kristján Þ. Halldórsson og Sigríður K. Þorgrímsdóttir frá Byggðastofnun. Valgeir Ægir Ingólfsson, ráðgjafi hjá AtVest starfaði að auki með verkefnisstjórninni.
Bíldudalur – samtal um framtíðina - Skilaboð íbúaþings, september 2013
Uppfært 12.02.2018
