Fara í efni  

Jafnlaunavottun

Byggðastofnun færð jafnlaunamerkið

Jafnréttisstofa hefur veitt Byggðastofnun heimild til að nota jafnlaunamerkið. Í því felst að staðfest er að Byggðastofnun hafi fengið vottun á jafnlaunakerfi sínu samkvæmt jafnlaunastaðli ÍST 85:2012 og uppfylli öll skilyrði staðalsins. Þar með hefur hún fengið staðfestingu á því að launaákvarðanir séu kerfisbundnar, að fyrir hendi sé jafnlaunakerfi samkvæmt kröfum jafnlaunastaðals og að reglubundið er fylgst með því hjá stofnuninni að starfsfólk sem vinnur sömu eða jafnverðmæt störf hafi sambærileg laun óháð kynferði. Í 1. grein jafnréttisáætlunar fyrir Byggðastofnun kemur fram að konum og körlum skulu greidd jöfn laun fyrir jafn verðmæt störf og skulu njóta sömu kjara er varða önnur starfskjör og réttindi.

Meginmarkmið jafnlaunavottunar er að vinna gegn kynbundnum launamun og stuðla að jafnrétti kynjanna á vinnumarkaði. Jafnlaunavottun var lögfest á sl. ári með lögum nr. 56/2017 sem fela í sér breytingu á lögum um jafna stöðu og jafnan rétt kvenna og karla nr. 10/2008. Samkvæmt lögunum skal jafnlaunavottun byggjast á Jafnlaunastaðlinum.

Byggðastofnun var ásamt Landmælingum Íslands í hópi brautryðjenda meðal opinberra stofnana á þessu sviði árið 2013 þegar Byggðastofnun hlaut jafnlaunavottun VR og hefur viðhaldið henni æ síðan. Stofnunin er því vel í stakk búin nú til að uppfylla allar kröfur hinna nýju laga. Megin breytingin frá jafnlaunavottun VR er sú að nú er framkvæmd verkefnisins komin á hendur opinbers aðila, Jafnréttisstofu, sem gefur út jafnlaunamerki þegar henni hefur borist vottunarskírteini ásamt skýrslu um niðurstöðu úttektar frá aðila sem hefur hlotið faggildingu í samræmi við reglugerð um vottun nr. 1030/2017 á jafnlaunakerfum fyrirtækja og stofnana á grundvelli staðalsins.

Jafnréttisáætlun Byggðastofnunar

Skráning á póstlista

  • Byggðastofnun  |  Sauðármýri 2  |  550 Sauðárkrókur 
  • Sími 455-5400
  • postur@byggdastofnun.is
  • Opið frá kl. 8:30-12:00 & 13:00-16:00  | kt. 450679-0389