Fréttir

Í dag birti Hagstofa Íslands nýja flokkun hagskýrslusvæða. Skilgreind hafa verið 206 smásvæði með íbúafjölda á milli 900 og 3.500 manns. Svæðaskiptingin er gerð vegna manntalsins 2021, en með henni uppfyllir Hagstofan skilyrði manntalsins um að birta hagskýrslur eftir litlum svæðum. Smásvæðaskiptingin var unnin í samvinnu við Byggðastofnun og studd fjárhagslega af Evrópusambandinu. Höfundar greinargerðarinnar þar sem flokkun hagskýrslusvæðanna útskýrð eru Ómar Harðarson hjá Hagstofu Íslands og Einar Örn Hreinsson fyrrverandi starfsmaður Byggðastofnunar. 

Um er að ræða mjög mikilvægt skref í að greina upplýsingar niður á smærri svæði og auðvelda alla yfirsýn. Það er ekki tilviljun að talað er um landsbyggðirnar en ekki landsbyggðina í eintölu. Aðstæður er mjög ólíkar á milli landsbyggðanna og upplýsingar um meðaltöl eða samtölur landsbyggðanna segja lítið um stöðuna í Vestmannaeyjum, Egilsstöðum eða Patreksfirði. Sama má segja um samtölur heilla landshluta. Norðurlandi eystra dregur t.d. mjög dám af stöðunni á Akureyri en síður af því hvernig staðan er á Þórshöfn eða í Mývatnssveit. 

Greinargerð um Hagskýrslusvæði í manntalinu 2021.

Sjá nánar frétt á vef Hagstofu Íslands.