Fréttir

Golli

Samgöngu- og sveitarstjórnarráðuneytið og Byggðastofnun hafa birt greinargerð um starfsemi Norðurslóðaáætlunar Evrópusambandsins (NPA) fyrir árin 2014-2020. Tilgangurinn með greinargerðinni er að leggja mat á árangur og ávinning Íslands af þátttöku í samstarfinu en ný áætlun er í undirbúningi fyrir tímabilið 2021-2027.

Ísland hefur verið aðili að NPA áætluninni frá árinu 2002. Eitt af markmiðum með þátttöku Íslands er að efla stofnanir og fyrirtæki á landsbyggðinni í alþjóðlegu samstarfi. Aðildin er hluti af byggðastefnu stjórnvalda og skilgreind sem slík í byggðaáætlun. Markmið áætlunarinnar er að stuðla að nýsköpun í atvinnulífi og eflingu búsetuþátta og mannauðs. 

Heildarframlag til NPA á tímabilinu 2014-2020 var 56,5 milljónir evra en þar af var framlag Íslands 3 milljónir evra, eða að meðaltali um 60 milljónir króna á ári. Alls hafa 58 verkefni fengið styrk og Ísland er þátttakandi í 31 verkefni, sem langflest eru staðsett á landsbyggðinni. Fjöldi verkefna, þátttakenda og afurðir benda til þess að ávinningur Íslands sé verulegur af þátttökunni og að íslenskir þátttakendur séu eftirsóttir samstarfsaðilar.

Núverandi tímabili Norðurslóðaáætlunarinnar lýkur um næstu áramót. Lagðar hafa verið fram tillögur um tvö áherslusvið sem umræðugrundvöllur fyrir endurskoðun áætlunarinnar. Þau eru: 

1. Snjallari Evrópa með því að stuðla að nýsköpun og snjöllum efnahagsbreytingum.
2. Grænni Evrópa þar sem stuðlað verði að lágkolefnasamfélögum, hreinum og vistvænum orkuskipum, grænum og bláum fjárfestingum, hringrásarhagkerfi og aðlögun að loftslagsbreytingum.

• Greinargerð Byggðastofnunar um NPA fyrir tímabilið 2014-2020 
• Hér er hægt að skoða einstök lönd og einstök verkefni á stafrænu korti
• Hér er að finna upplýsingar (bæklinga) um 3-4 verkefni í hverju þátttökulandi
• Myndband með leiðbeiningum um stafræn kort NPA

Frétt af vef Samgöngu- og sveitarstjóranrráðuneytisins.