Fréttir

Hjördís með leiðbeinanda og prófdómara

Hjördís Guðmundsdóttir lauk nýverið meistaranámi frá Háskólanum á Akureyri. Meistaraverkefni hennar er hluti af Magister Artium-prófi í félagsvísindum og var styrkt af Byggðarannsóknasjóði í desember 2020. Viðfangsefni rannsóknarinnar er íslenskir snúbúar þar sem Hjördís rýnir í einkenni þeirra sem flust hafa búferlum erlendis og snúið aftur heim og ber saman við þá sem ekki hafa búið erlendis á fullorðinsárum, þ.e. áhrif kyns, hjúskaparstöðu, menntunar, aldurs við heimkomu og núverandi búsetubæjar. Byggt er á gögnum rannsóknarverkefnisins Byggðafesta og búferlaflutningar. Til að meta líkur ólíkra flutningshvata voru framkvæmdar fimm tvíkosta aðhvarfsgreiningar. Hvatarnir sem voru til skoðunar eru atvinnumöguleikar á Íslandi, nálægð við vini og fjölskyldu, þátttaka í íslensku samfélagi, að njóta íslenskrar náttúru og ósk um að ala börnin upp á Íslandi.

Niðurstöðurnar benda til að konur séu líklegri til að snúa heim vegna fjölskyldu en að karlar séu líklegri til að snúa heim vegna starfsframa. Konur eru líklegri til að meta nálægð við vini og fjölskyldu sem og uppeldi barna sem helstu ástæðu fyrir heimkomu en karlar eru líklegri til að flytja heim vegna atvinnutækifæra. Fram kemur að háskólamenntun er áhrifaþáttur sem eykur líkur Íslendinga á flutningum aftur heim í samanburði við þá sem ekki hafa háskólamenntun. Líkurnar eru enn meiri fyrir þá sem sóttu sér háskólamenntun erlendis. Einnig gefa niðurstöður til kynna að menntunarstig snúbúa sé hærra en þeirra sem ekki hafa búið erlendis og að hlutfallslega fleiri snúbúar eru búsettir á höfðuborgarsvæðinu en utan þess. Meirihluti þeirra sem flytja úr landi og snúa aftur heim hafa háskólamenntun en þó að stór hluti heimfluttra búi á höfuðborgarsvæðinu eru heimfluttir íslenskir ríkisborgarar á bilinu 6-11% af íbúum annarra bæja á Íslandi.

Höfundur greinir frá að þörf sé á frekari rannsóknum á hlutfalli karla og kvenna sem snúa heim vegna eigin atvinnumöguleika í samanburði við atvinnumöguleika maka síns. Jafnframt að aukin þekking og skilningur á aðdráttaraflinu við heimflutninga íslenskra ríkisborgara sé verðmæt fyrir framtíðarstefnu og dreifingu íbúa.

Sjá meistararitgerð: Home for kin or career? Exploring return migration of Icelandic citizens

 _____________________________________________________________________________________________________________