Fréttir

Frá Mývatnssveit. Mynd Kristján Þ. Halldórsson

Yfirskrift ráðstefnunnar og viðfangsefni er Félagslegur fjölbreytileiki samfélaga, jafnvægi, áskoranir eða vannýtt sóknarfæri?

Undanfarin ár hefur íbúum með erlent ríkisfang fjölgað verulega í öllum landshlutum, mismikið eftir svæðum. Er vöxtur samfélaga í jafnvægi? Eru áskoranir? Eða vannýtt sóknarfæri? Fram koma sjónarmið þeirra sem vinna að rannsóknum og stefnumótun á þessu sviði sem og annarra sem vinna á vettvangi um stöðu og þróun byggða, sjá dagskrá!  

Það er von skipuleggjenda að ráðstefnan verði vel sótt og verði til þess að auðga umræðu um búsetu og byggðaþróun. Ráðstefnan á erindi við sveitarstjórnarfólk, fulltrúa atvinnulífs, stefnumótendur og aðra sem starfa eða sinna rannsóknum á vettvangi byggðamála. Einnig verður hægt að fylgjast með í streymi.

Byggðaráðstefnur eru haldnar annað hvert ár á vegum Byggðastofnunar. Tilgangur þeirra er að tengja saman fræðilega og hagnýta þekkingu á byggðaþróun með það að markmiði að stuðla að sjálfbærri þróun byggða um allt land. Áherslur byggðaráðstefnu hafa verið á tiltekinn málaflokk hverju sinni, síðast var yfirskriftin „Búsetufrelsi?“ Upplýsingar um fyrri byggðaráðstefnur má sjá á vef Byggðastofnunar.

Að ráðstefnunni 2025 standa Byggðastofnun, Samband íslenskra sveitarfélaga og Samband sveitarfélaga og atvinnuþróunar á Norðurlandi eystra, í samvinnu við Þingeyjarsveit. 

Við hlökkum til að sjá ykkur! Skráningarfrestur er til og með 27. október. Skráning hér!