Fréttir

Ársreikningur Byggðastofnunar fyrir árið 2015, var staðfestur af stjórn stofnunarinnar 17. mars 2016.

Hagnaður ársins nam 98,9 milljónum króna.  Eiginfjárhlutfall í lok júní skv. eiginfjárákvæðum laga nr. 161/2002 um fjármálafyrirtæki var 21,56% en var 20,2% í lok árs 2014.

Um stofnunina gilda lög um Byggðastofnun nr. 106/1999 og reglugerð nr. 347/2000. Hlutverk Byggðastofnunar er að efla byggð og atvinnulíf með sérstakri áherslu á jöfnun tækifæra allra landsmanna til atvinnu og búsetu. Í samræmi við hlutverk sitt undirbýr, skipuleggur og fjármagnar stofnunin verkefni og veitir lán með það að markmiði að treysta byggð, efla atvinnu og stuðla að nýsköpun í atvinnulífi. Fjármögnun verkefna skal eftir föngum vera í samstarfi við aðra. Stofnunin skipuleggur og vinnur að atvinnuráðgjöf í samstarfi við atvinnuþróunarfélög, sveitarfélög og aðra haghafa.  Byggðastofnun fylgist með þróun byggðar í landinu, m.a. með gagnasöfnun og rannsóknum. Stofnunin getur gert eða látið gera áætlanir um þróun byggðar og atvinnulífs í þeim tilgangi að treysta búsetu og atvinnu í byggðum landsins.

Helstu niðurstöður úr ársreikningi Byggðastofnunar 2015

• Hagnaður ársins nam 98,9 milljónum króna.
• Eiginfjárhlutfall skv. lögum um fjármálafyrirtæki var 21,56% en skal að lágmarki vera 8%
• Hreinar vaxtatekjur voru 454,8 milljónir króna eða 54,3% af vaxtatekjum, samanborið við 399,4 milljónir króna (49,1% af vaxtatekjum) hreinar vaxtatekjur árið 2014.
• Laun og annar rekstrarkostnaður nam 392,6 milljónum króna samanborið við 387,1 milljónir árið 2014.
• Eignir námu 14.417 milljónum króna og hafa hækkað um 499,8 milljónir frá árslokum 2014.  Þar af voru útlán og fullnustueignir 10.308 milljónir.
• Skuldir námu 11.666 milljónum króna og hækkuðu um 401 milljón á árinu.

Um ársreikninginn

Hagnaður ársins nam 98,9 milljónum króna.  Skýrist hagnaður tímabilsins fyrst og fremst á lægri framlögum á afskriftarreikning útlána, matsbreytingu hlutabréfa og sölu fullnustueigna. 

Eiginfjárhlutfall Byggðastofnunar var 21,56% í lok tímabilsins.

Horfur

Eiginfjárstaða stofnunarinnar er áfarm sterk og gefur henni færi á að vera öflugur bakhjarl fyrirtækja á landsbyggðinni.

Með bréfi Fjármálaeftirlitsins dagsettu 1. mars 2016 var Byggðastofnun tilkynnt að FME hefði ákveðið að samanlögð krafa um eiginfjárauka sem Byggðastofnun bæri að viðhalda frá og með 1. janúar 2016 væri 1% sveiflujöfnunarauki sem taki gildi 12 mánuðum eftir ákvörðun Fjármálaeftirlitsins.  Að auki ber Byggðastofnun að viðhalda 1% verndunarauka frá 1. janúar 2016 samkvæmt 84. gr. e laga um fjármálafyrirtæki, sbr. 84. gr. a sömu laga.  Verndunarauki samkvæmt nefndum lagaákvæðum hækkar í áföngum, fyrst í 1.75% hinn 1. júní 2016 og svo í 2.5% hinn 1. janúar 2017.  Hinni samanlögðu kröfu skal jafnframt viðhaldið á samstæðugrunni. Miðað við hækkun verndunaraukans 1. júní 2016 og 1. janúar 2017 og gildistöku sveiflujöfnunaraukans 1. mars 2017 verður hin samanlagða krafa að öllu óbreyttu 3,5%.

Eins og að ofan greinir er eiginfjárstaða Byggðastofnunar sterk og því mun hún geta uppfyllt þessa eiginfjárkröfu.

Nánari upplýsingar

Nánari upplýsingar veitir Aðalsteinn Þorsteinsson, forstjóri Byggðastofnunar í síma 455 5400 eða á netfanginu adalsteinn@byggdastofnun.is

Ársreikningur Byggðastofnunar 2015

Lykiltölur úr ársreikningi og samanburður við fyrri ár