Fréttir

Frá fundi stýrihóps og Fjórðungssamb Vestfirðirðin

Landshlutasamtök sveitarfélaga vinna nú hörðum höndum að gerð nýrra sóknaráætlana sem taka eiga gildi um næstu áramót. Þegar hafa drög að áætlunum þriggja svæða verið sett inn í opna samráðsgátt Stjórnarráðsins til kynningar og fleiri munu skila sér þangað inn á næstu vikum. Ein áætlun hefur þegar verið samþykkt.

Drög að nýrri sóknaráætlun Samtaka sveitarfélaga á Norðurlandi vestra (SSNV), Samtökum sunnlenskra sveitarfélaga (SASS) og Fjórðungssambands Vestfirðinga hafa verið sett í samráðsgáttina. Þegar er búið að samþykkja sóknaráætlun fyrir Norðurland vestra. Í öllum þessum áætlunum eru höfuðmálaflokkarnir atvinnuþróun og nýsköpun, umhverfismál, en einnig lögð áhersla á menningu, menntun, lýðfræðilega þróun, samfélag og skipulag.

Sóknaráætlanir landshluta eru unnar í samráði við heimamenn með fundum víða um umdæmi landshlutasamtakanna. Á Vestfjörðum voru haldnir opnir fundir og einnig fundir með ungmennum 16-25 ára. Á Norðurlandi vestra og Suðurlandi voru einnig haldnir fundir víða um svæðið. Á öllum svæðum voru síðan haldnir stórir fundir fyrir allt svæðið sem voru vel sóttir. Gera má ráð fyrir að unnið sé með svipuðu sniði á öðrum svæðum.

Áherslur í nýjum sóknaráætlunum hafa verið til kynningar og umræðu á fundum landshlutasamtaka og stýrihóps Stjórnarráðsins um byggðamál, sem eru haldnir þessa dagana. Á fundunum er einnig rætt um árangur starfsins undangengið ár. Slíkir fundir eru á hverju hausti og annað hvert ár heimsækir stýrihópurinn landshlutasamtökin. Þegar hafa verið haldnir fundir á Vesturlandi, Ísafirði og Akureyri og á næstunni verður fundað á Norðurlandi vestra, Austurlandi, Suðurnesjum og Suðurlandi og endað á höfuðborgarsvæðinu.