Fréttir

25 nýsköpunarverkefni úr öllum landshlutum hlutu styrk úr Lóu, nýsköpunarstyrkjum fyrir landsbyggðina, þegar úthlutað var úr sjóðnum í gær. Þetta er í þriðja sinn sem háskóla-, iðnaðar- og nýsköpunarráðuneytið úthlutar styrkjum úr sjóðnum. Alls bárust 97 umsóknir í ár frá öllum landshlutum og var heildarfjárhæð úthlutana 100 milljónir króna. Viðfangsefni umsókna var á ýmsum sviðum en áherslur Lóu þetta árið voru verkefni sem komin eru af byrjunarstigi og tengjast samfélagslegum áskorunum á borð við loftslagsmál, sjálfbærni í heilbrigðis- og menntamálum og sjálfbærni í matvælaframleiðslu.

Lýsingar á verkefnunum 25 sem hlutu brautargengi í ár má nálgast hér og eru þær sannarlega ein birtingarmynd gróskunnar sem ríkir í nýsköpun í byggðum landsins. Sem dæmi um verkefni sem hljóta styrk í ár er áburðarframleiðsla úr hliðarstraumum laxeldis á Vestfjörðum, uppbygging sjálfbærar matvælaframleiðslu á Austurlandi, þróun og vinnsla bioplasts úr hampi á Norðurlandi eystra, þróun hliðarafurða laxa úr landeldi á Suðurlandi og þróun skráningar- og greiðslugáttar fyrir íþróttamótakerfi framtíðarinnar á Norðurlandi vestra.

Atvinnuráðgjafar landshlutasamtaka í öllum landshlutum veita ráðgjöf til einstaklinga, hópa og fyrirtækja um sókn í Lóuna, sem og aðra sjóði hins opinbera, í gegnum samninga við Byggðastofnun. Við hvetjum alla sem hafa hug á að sækja sér fjármagn í gegnum slíkar leiðir að hafa samband við atvinnuráðgjafa í sinni heimabyggð, en upplýsingar um ráðgjöfina má finna á heimasíðum landshlutasamtakanna.

Byggðastofnun óskar öllum styrkhöfum til hamingju með góðan árangur.

Nánar má lesa um úthlutun sjóðsins á vef Stjórnarráðsins hér.