Fréttir

Drengur Óla Þorsteinsson hefur verið ráðinn í starf lögfræðings á fyrirtækjasviði Byggðastofnunar. Hann var valinn úr hópi margra hæfra umsækjanda en alls sóttu átta aðilar um stöðuna, þrjár konur og fimm karlar.

Drengur lauk B.A. prófi í lögfræði við Háskólann á Akureyri og M.L. prófi í lögfræði frá sama háskóla. Drengur hefur fjölbreytta reynslu að baki m.a. af lögfræðistörfum á almennum vinnumarkaði með áherslu á samningagerð við innlenda og erlenda aðila, ráðgjöf og þátttöku í opinberum útboðum auk þess sem hann hefur mikla reynslu af lánamálum hjá Íbúðalánasjóði. Frá árinu 2019 hefur hann starfað hjá ÍL/HMS sem deildarstjóri/teymisstjóri húsnæðisbóta, og síðast verkefnastjóri leigumarkaðar, þar sem hann bar ábyrgð á stýringu sérfræðiteymis, greiningum og gagnasöfnun, lögfræðilegum verkefnum og þátttöku í mótun regluverks. Drengur hefur yfirgripsmikla þekkingu og reynslu af opinberri stjórnsýslu, greiningarvinnu og erlendri samningagerð sem fellur vel að auglýstu starfi. 

Drengur er kraftmikill einstaklingur og mun verða öflug viðbót við frábæran hóp starfsmanna stofnunarinnar. 

Við bjóðum Dreng hjartanlega velkominn til okkar en áætlað er að hann hefji störf 1. júní.