Fréttir

Opnað hefur verið fyrir umsóknir um styrki til að styðja við uppbyggingu vinnustaðaklasa á landsbyggðinni. Veittir verða styrkir fyrir allt að 50 milljónir kr. Byggðastofnun heldur utan um umsýslu vegna styrkjanna og er umsóknarfrestur er til 2. febrúar nk.

Innviðaráðherra veitir styrkina sem veittir eru á grundvelli byggðaáætlunar fyrir árin 2022-2036, nánar tiltekið aðgerð A.7 um óstaðbundin störf. Markmiðið er að fjölga atvinnutækifærum og auka fjölbreytileika starfa á landsbyggðinni. Aðgerð A.7 felur í sér að styrkja uppbyggingu vinnustaðaklasa og að fjölga óstaðbundnum störfum á landsbyggðinni. 

Nánar um styrkina

Styrkhæfir eru aðilar sem reka vinnustaðaklasa utan höfuðborgarsvæðisins. Í forgangi verða minni staðir þar sem atvinnulíf er einhæft, svæði sem hafa orðið fyrir verulegum áföllum í atvinnulíf eða svæði á fámennum vinnusóknarsvæðum.

Til greina kemur að veita einskiptis framlög vegna launakostnaðar við að koma af stað nýrri starfsemi, styrki til að fjölga plássum gegn langtímaskuldbindingu um nýtingu plássa eða rekstrarstyrki til að greiða sameiginlegan kostnað við starfsemina.

Vinnustaðaklasi er skilgreint sem skipulagt og samnýtt vinnurými þar sem fjölbreytt vinnuaðstaða stendur til boða fyrir fleiri en einn vinnustað eða starfsstöðvar vinnustaða.

Fjallað er um valnefnd og mat umsókna í reglum um úthlutun innviðaráðherra á framlögum sem veitt eru á grundvelli stefnumótandi byggðaáætlunar fyrir árin 2022-2036. Fjallað er nánar um verkefnið óstaðbundin störf í aðgerðaáætlun byggðaáætlunar (aðgerð B.7).

• Auglýsing um úthlutun styrkjanna (B7)
• Umsóknargátt Byggðastofnunar
• Reglur um úthlutun innviðaráðherra á framlögum sem veitt eru á grundvelli stefnumótandi byggðaáætlun fyrir árin 2022-2036 

Nánari upplýsingar veitir Sigurður Árnason, sérfræðingur á þróunarsviði, sigurdur@byggdastofnun.is. 

Frétt af vef Stjórnarráðsins.