Fréttir

Nú nýverið lauk fjárhagslegri endurskipulagningu Moltu ehf í Eyjafirði. Félagið náði samkomulagi við stærstu kröfuhafa sem hafa nú endurskipulagt fjárhag félagsins. Eftir endurskipulagninguna eru Flokkun ehf. og Byggðastofnun stærstu hluthafar félagsins. Sveitarfélögin á Eyjafjarðarsvæðinu eiga þó yfir helmings hlut ýmist beint eða óbeint í gegnum eignarhlut í Flokkun ehf.

Mikil þörf er fyrir starfsemi Moltu ehf á svæðinu en félagið vinnur moltu úr lífrænum úrgangi. Stöðin sem var formlega opnuð í ágúst 2009 er ein stærsta jarðgerðarstöð sinnar tegundar í Evrópu og er ætlað að taka á móti lífrænum úrgangi á Akureyri, af Eyjafjarðarsvæðinu og úr S - Þingeyjarsýslu. Afkastageta stöðvarinnar er 10 – 13 þúsund tonn en nú fara um 5.000 tonn af lífrænum úrgangi árlega í gegnum jarðgerðarstöðina þar af tæp tvö tonn af sláturúrgangi og 1,2 tonn af lífrænum úrgangi frá heimilum á svæðinu.

Á meðfylgjandi súluriti má sjá hvert markmið Landsáætlunar um förgun úrgangs var fyrir árið 2013 og hvernig förgun á lífbrjótanlegum úrgangi var háttað á Norðurlandi árið 2011.