Fréttir

NPA svæðið 2021-2027

Stjórn Norðurslóðaáætlunarinnar hefur samþykkt fyrirkomulag næstu tveggja kalla. Markmið áætlunarinnar er að stuðla að samstarfsverkefnum milli landanna sjö sem miða að því að finna lausnir á sameiginlegum áskorunum á sviði atvinnu-og byggðaþróunar.

Fjórða kall eftir aðalverkefnum verður opið frá 11. október – 2. febrúar og fimmta kall er áætlað frá 11. júní – 30. september 2024.

Fjórða kalli verður hleypt af stokkunum með netviðburði þann 11. október,  hér er hægt að skrá sig. Allir sem áhuga hafa eru hvattir til þess að skrá sig, hvort sem þeir ætla að sækja um núna eða mögulega síðar. Gert er ráð fyrir að umsóknir verði afgreiddar á fundi stjórnarinnar í lok maí 2024.

Áætlað er að afgreiða umsóknir um fimmta kallið í desember 2024. Væntanlega verður það kall það síðasta að sinni þar sem gera má ráð fyrir að megin hluta fjármuna áætlunarinnar hafi þá verið ráðstafað.

Með því að hafa köllin opin lengur er verið að gefa aðilum lengri tíma til að þróa verkefnahugmyndir sínar og mynda sterk teymi um þær. Þá gefur lengri tími einnig betra tækifæri til að skipuleggja stuðningsaðgerðir fyrir umsækjendur af hálfu áætlunarinnar.

Samkvæmt fyrri áætlun átti að opna undirbúningskall í janúar 2024 en í ljósi þess að fjórða kallið verður ennþá opið á þeim tíma hefur verið ákveðið að fresta opnun þess og endurskoða í ljósi niðurstöðu úr fjórða kallinu.

Allar frekari upplýsingar má nálgast á heimasíðu áætlunarinnar en landstengiliður Norðurslóðaáætlunarinnar er Reinhard Reynisson, reinhard@byggdastofnun.is

Norðurslóðaáætlunin (Northern Periphery and Arctic Programme) er samstarfsvettvangur Evrópusambandsríkjanna Írlands,  Svíþjóðar og Finnlands og einnig Noregs, Íslands, Grænlands og Færeyja. Markmið áætlunarinnar er að stuðla að samstarfsverkefnum milli landanna sem miða að því að finna lausnir á sameiginlegum áskorunum á sviði atvinnu- og byggðaþróunar og er núgildandi áætlunartímabil 2021-2027.