Fréttir

Í gær, miðvikudaginn 6. október, funduðu  forstjóri Byggðastofnunar ásamt þremur öðrum starfsmönnum stofnunarinnar, með heimamönnum á Borgarfirði eystra um stöðu mála í byggðarlaginu. Tilefni fundarins er að Fiskverkun Kalla Sveins ehf. hefur sagt upp öllu starfsfólki sínu og taka uppsagnirnar gildi um næstu áramót. Eins og fram hefur komið í fréttum hefur fyrirtækið misst saltfiskmarkaði sína.

Fiskverkunin er langstærsta fyrirtækið í sveitarfélaginu og  yrði það því  gríðarlegt högg fyrir byggðarlagið komi uppsagnirnar til framkvæmda.

Fundurinn var einkar gagnlegur fyrir starfsmenn Byggðastofnunar, en á honum var, ásamt því að ræða stöðu Fiskverkunar Kalla Sveins, farið yfir stöðu atvinnumála almennt í sveitarfélaginu, stöðu sveitarfélagsins og framtíðarhorfur á staðnum.

Af hálfu heimamanna sátu fundinn, Karl Sveinsson fiskverkandi, sveitarstjórn Borgarfjarðarhrepps, sveitarstjóri, trúnaðarmaður starfsfólks fiskverkunarinnar,  framkvæmdastjóri Þróunarfélags Austurlands og fulltrúi frá Afli starfsgreinafélagi.