Fréttir

Styrkþegar 2022 á Stöðvarfirði

Föstudaginn 18. nóvember sl. var haldin úthlutunarhátíð á Stöðvarfirði þar sem styrkjum var úthlutað í fyrsta sinn úr Frumkvæðissjóði Sterks Stöðvarfjarðar. Byggðaþróunarverkefnið hófst í mars sl. með vel heppnuðu íbúaþingi. Sterkur Stöðvarfjörður er samstarfsverkefni Byggðastofnunar, Fjarðabyggðar, Samtaka sveitarfélaga á Austurlandi og Austurbrúar. Verkefnið er eitt af nokkrum byggðaþróunarverkefnum á landsbyggðinni sem starfa undir merkjum Brothættra byggða. Verkefnisstjóri Sterks Stöðvarfjarðar er Valborg Ösp Árnadóttir Warén.

Að þessu sinni var sjö milljónum króna úthlutað úr frumkvæðissjóði verkefnisins. Alls bárust 18 umsóknir í sjóðinn og fengu 13 verkefni styrk. Verkefnin eru fjölbreytt og áhugaverð og stuðla m.a. að bættu mannlífi, atvinnusköpun og fegrun umhverfisins. Það verður sannarlega spennandi að fylgjast með styrkhöfum vinna að verkefnum sínum á næstu misserum.

Hér má sjá myndir sem teknar voru á úthlutunarhátíðinni frá Valborgu Ösp verkefnisstjóra.