Fréttir

Arnar Már forstjóri, Hrund forstöðumaður fyrirtækjasviðs og Reinhard sérfræðingur á þróunarsviði heimsóttu sveitarfélög á Austfjörðum í síðasta mánuði, en markmiðið er að heimsækja öll sveitarfélögin á starfssvæði stofnunarinnar til þess að ræða viðfangsefni þeirra og með hvaða hætti Byggðastofnun geti stuðlað að framgangi þeirra. 

Að þessu sinni voru teknir fundir með fulltrúum Fjarðabyggðar í Frystihúsinu í Breiðdalsvík, Vopnafjarðarhrepps í ráðhúsinu á Vopnafirði, Múlaþings í ráðhúsinu á Egilsstöðum, Fljótsdalshrepps í félagsheimilinu Végarði og Hornafjarðar í ráðhúsinu á Höfn. 

Umræðuefni fundanna eru fjölbreytt og breytileg á milli sveitarfélaga, s.s. lánveitingar Byggðastofnunar, aflamark stofnunarinnar, aðgengi að sérfræðiþjónustu, verslun í dreifbýli, almenningssamgöngur á milli byggða, opinber grunnþjónusta, óstaðbundin störf, brothættar byggðir, áhrif loftslagsbreytinga á sveitarfélög o.s.frv.

Fundirnir hafa reynst einkar vel, en nú hafa 25 sveitarfélög verið heimsótt í þeim tilgangi að styrkja samstarfið um eflingu byggðar enn frekar. 

Að loknum fundi með stjórnendum Vopnafjarðarhrepps

Hluti fundarmanna á Hornafirði

Að loknum fundi í Végarði

Úr ráðhúsinu á Egilsstöðum