Fréttir

Árlegur íbúafundur verður haldinn í byggðaþróunarverkefninu DalaAuði miðvikudaginn 8. okt. nk. kl. 17:30 í félagsheimilinu Dalabúð í Búðardal. Nú eru liðin tæp fjögur ár frá því að verkefnið hóf göngu sína í samstarfi íbúa Dalabyggðar, sveitarfélagsins, Vestfjarðastofu og Byggðastofnunar.

Mikil gróska í Dalabyggð

Verkefnistíminn hefur einkennst af mikilli grósku, frumkvæði og samheldni íbúa. Fjölmörg spennandi frumkvæðisverkefni hafa farið af stað í byggðarlaginu sem stuðlað hafa að eflingu byggðarlagsins á mörgum sviðum. Unnið hefur verið ötullega að þeim markmiðum sem íbúar settu í upphafi verkefnis og finna má í verkefnisáætlun, sem uppfærð hefur verið árlega. Linda Guðmundsdóttir, verkefnisstjóri hefur staðið í brúnni og stýrt verkefninu af myndugleika og hefur verið í miklu samstarfi við starfsfólk sveitarfélagsins. Samvinnan hefur verið til fyrirmyndar og skilað góðum árangri í að efla samfélagið á marga vegu.

Málefni íbúafundar

Á íbúafundinum verður farið yfir stöðuna og þann árangur sem hefur náðst fram til þessa. Dr. Vífill Karlsson verður gestur fundarins og mun varpa ljósi á áhrif DalaAuðs. Annar fulltrúa íbúa í verkefnisstjórn, Bjarnheiður Jóhannsdóttir, mun einnig ávarpa fundinn. Þá munu styrkþegar stíga á stokk og greina frá frumkvæðisverkefnum og framvindu þeirra. Líkt og áður gefst íbúum kostur á að ræða saman í umræðuhópum um stöðu verkefnisáætlunar og leggja til breytingar eftir atvikum.

Vænst er góðrar þátttöku

Íbúar Dalabyggðar og velunnarar eru hvattir til góðrar mætingar og þátttöku á fundinum. Þar munu gefast tækifæri til að hafa áhrif á áherslur verkefnisins á árinu 2026 en samkvæmt samningimun Byggðastofnun draga sig í hlé úr verkefninu í lok næsta árs. Áætlað er að íbúafundinum ljúki um kl. 19:30.

Verkefnið Brothættar byggðir er ein af aðgerðum Byggðaáætlunar, C.2, og markmið þess er að spornað verði við viðvarandi fólksfækkun í smærri byggðarlögum. Verkefnið byggir á samstarfi Byggðastofnunar, viðkomandi sveitarfélags, landshlutasamtaka og síðast en ekki síst íbúa hvers þátttökubyggðarlags. Því er einkum ætlað að styðja við frumkvæði og þátttöku íbúa til hagsbóta fyrir samfélagið í víðum skilningi.