Fréttir

Byggðastofnun hefur gefið út skýrslu um þátttöku Íslands í Norræna Atlantssamstarfinu (NORA) fyrir tímabil núverandi samstarfsáætlunar 2017 – 2020.

Áhugasamir geta nálgast skýrsluna hér. 

Í skýrslunni leggur landstengiliður NORA á Íslandi, sem jafnframt er starfsmaður Byggðastofnunar, mat á þátttöku Íslands á vettvangi Norræna Atlantssamstarfið (NORA) á árunum 2017 - 2020. 

Heildarframlag til NORA á tímabilinu eru 35,5 milljónir danskar krónur. Framlagið skiptist þannig að um 80% kemur frá Norrænu ráðherranefndinni þar sem NORA er partur af MR-NER hluta ráðherranefndarinnar og um 20% er bein framlög þátttökulandanna. Framlög þátttökulandanna eru misjöfn en Noregur leggur til 41%, Ísland 29%, Færeyjar 15% og Grænland 15%. Beint framlag Íslands til NORA samstarfsins á tímabilinu er um 2 milljónir danskar krónur. 

Íslendingar hafa verið duglegir að sækja í sjóðinn og hafa flest styrkt verkefni íslenska þátttakendur ásamt því að þónokkur eru leidd af íslenskum aðilum og hefur þeim verkefnum fjölgað undanfarin ár. NORA hefur á tímabilinu styrkt 42 verkefni sem stuðla að eflingu atvinnulífs og byggða með auknu samstarfi á milli Íslands, Færeyja, Grænlands og norður- og vesturhluta Noregs og af þeim hafa Íslendingar tekið þátt í 34 verkefnum og leitt 10 þeirra. Þau verkefni sem Ísland hefur leitt hlutu samtals 2,8 milljónir danskra króna í styrk

Landstengiliður NORA á Íslandi er Eva Pandora Baldursdóttir en er hún farin í fæðingarorlof nú eftir útgáfu skýrslunnar. Sigríður K. Þorgrímsdóttir tekur við sem landstengiliður í fjarveru Evu Pandoru.