Fréttir

Nordic Welfare: The North Atlantic Way

Ráðstefna NORA undir yfirskriftinni Nordic Welfare: The North Atlantic Way var haldin á Hilton-Nordica í Reykjavík dagana 7.-8. nóvember sl. Ráðstefnan var opin öllum og sóttu hana tæplega 100 manns frá öllum Norðurlöndunum og víðar að.

Anna Lilja Gunnarsdóttir ráðuneytisstjóri í velferðarráðuneytinu setti ráðstefnuna í fjarveru ráðherra. Ráðstefnustjóri var David Freshwater frá OECD, en hann er einn höfunda svæðagreiningar sem NORA fékk OECD til að vinna fyrir sig og út kom árið 2011. Í framhaldi af svæðagreiningu OECD setti NORA á fót vinnuhóp sem gengur undir heitinu „Hugmyndasmiðja“ og sendi nýverið frá sér sína aðra tillögugerð, sem um má lesa hér.

Á fyrsta hluta ráðstefnunnar var rætt um norræna velferðarkerfið á Norður-Atlantshafssvæðinu út frá efnahagsmálum, stjórnmálum, sögulegu sjónarhorni og alþjóðlegu þar sem Betty-Ann Bryce frá OECD flutti erindi.

Í síðari hluta var fjallað um niðurskurð þjónustu og þar flutti Sigurður Guðmundsson staðgengill skrifstofustjóra í fjármála- og efnahagsráðuneyti erindi af Íslands hálfu. Í umfjöllun um fjarlægðir til höfuðborga eða þjónustukjarna hélt Þóroddur Bjarnason prófessor við HA og stjórnarformaður Byggðastofnunar erindi sem hann nefndi The unaffordable luxury of living far away. Þá var fjallað um þátt fjölskyldna og sjálfboðaliðasamtaka og loks voru fyrirlestrar um fjarlækningar, vélmenni og tölvutækni í velferðarþjónustu.

Á síðari deginum voru málstofur um annars vegar heilbrigðis- og félagsþjónustu og hins vegar um menntamál. Þar fluttu erindi Sveinn Magnússon skrifstofustjóri úr velferðarráðuneyti sem sagði frá verkefnum ráðuneytisins og áhrifum hrunsins á velferðarkerfið og Friðbjörg Matthíasdóttir sveitarstjórnarfulltrúi sem sagði frá dreifmenntaverkefninu í Vesturbyggð. Þóra Arnórsdóttir stjórnaði menntamálstofunni af röggsemi og kynnti niðurstöður en Uni Arge frá Færeyjum stjórnaði hinni málstofunni.

Glærur frá fyrirlestrum og myndir frá ráðstefnunni verða fljótlega aðgengilegar á heimasíðu NORA.