Fréttir

Samþykktar hafa verið lánveitingar til 35 aðila að fjárhæð 2,7 ma.kr. sem falla undir bakábyrgðakerfi InvestEU eða 84,4% af heildarfjármagninu. Stofnunin er í viðræðum við Evrópska Fjárfestingasjóðinn um stækkun pottsins.

Í júní 2024 var ritað undir samning við Evrópska Fjárfestingabankann (EIB) og Evrópska Fjárfestingasjóðinn (EIF) um aðild að InvestEU ábyrgðasamkomulaginu. Samkomulagið felur m.a. í sér möguleika fyrir stofnunina að veita lán í ákveðnum flokkum með hærra veðsetningarhlutfalli en áður þekkist.  Þannig hefur Byggðastofnun heimildir til allt að 3,2 ma.kr. lánveitinga í sérstökum lánaflokkum sem eru tryggðir að hluta með ábyrgð frá EIF.  Þetta eru m.a. lán sem sérstaklega eru ætluð nýliðun í landbúnaði, atvinnurekstri í viðkvæmum byggðarlögum og umhverfisvænum verkefnum.

Mikil ásókn hefur verið í lánaflokka Byggðastofnunar undir þessu samkomulagi og gengið hefur hraðar á bakábyrgð InvestEU en áætlanir gerðu ráð fyrir. Sá pottur er að tæmast en stofnunin hefur sótt um auknar heimildir til EIF. Niðurstöðum úr þeirri umsókn er að vænta á fyrsta ársfjórðungi næsta árs. Þar til niðurstaða fæst um auknar heimildir munu lánaflokkarnir sem heyrðu undir samkomulagið verða áfram í boði en almennar veðheimildir stofnunarinnar munu gilda. Fyrst í lánum til nýliðunar í landbúnaði og svo í öðrum flokkum. Þannig mun sem dæmi áfram verða lánað til nýliðunar í landbúnaði en aðeins upp í 75% veðhlutfall í stað 90%.

Þörf er fyrir fjölbreytta lánaflokka á starfssvæði stofnunarinnar og hefur þessi mikla eftirspurn sýnt hve mikilvægt er að fjármagn sé tryggt til eflingar atvinnulífs í landbyggðunum.  Stofnunin bindur vonir við jákvæðar undirtektir EIF og að framboð á þessum mikilvægum lánum með hærri veðsetningarhlutföllum verði áfram tryggt á nýju ári.

Nánari upplýsingar um lánflokka stofnunarinnar má finna hér en einnig er hægt að senda fyrirspurnir á lánasérfræðinga á netfangið byggdastofnun@byggdastofnun.is