Fréttir

Iðnaðarráðherra skipaði í október 2002 fimm manna verkefnisstjórn um byggðaáætlun fyrir Eyjafjörð. Hlutverk verkefnisstjórnarinnar er að gera tillögu til ráðherra um stefnumörkun byggðaáætlunar fyrir Eyjafjörð. Miðað er við að verkefninu ljúki eigi síðar en við lok ársins 2004. Verkefnisstjórnin hefur haldið fjölda funda, með sérfræðingum norðan heiða og sunnan, og eins hefur nefndin leitast við að kynna sér hug margra lykilmanna á sviði atvinnu-, menningar- og félagsmála til uppbyggingar á svæðinu. Skýrsla verkefnisstjórnarinnar hefur verið lögð fram. Þar er að finna hátt í sjötíu tillögur um eflingu byggðar á Eyjafjarðarsvæðinu sem miða allar að því að auka lífsgæði og samkeppnishæfni þess. Þá er lagt til að gerður verði svokallaður vaxtarsamningur, en það er samkomulag opinberra aðila og einkaaðila þar sem sett eru tiltekin markmið um fjölgun starfa og aukna veltu í skilgreindum vaxtargreinum svæðisins. Unnið verður að framkvæmd samningsins samkvæmt finnskri fyrirmynd, en þar í landi hafa slíkir samningar skilað góðum árangri. Framkvæmdir eru hafnar við rannsóknarhús sem ríkisstjórnin ákvað að reisa í tengslum við Háskólann á Akureyri og er stefnt að því að taka húsið í notkun í lok árs 2004. Fyrirhugað er að ýmsar stofnanir ríkisins hafi aðstöðu í rannsóknarhúsinu.