Fréttir

Eitt af meginverkefnum á ársfundum NORA er að veita verkefnastyrki. Styrkhafar eru valdir úr hópi umsækjenda. Seinasti umsóknarfrestur var 2. október 2017 og voru styrkhafar valdir á ársfundi NORA 6. desember 2017. Ákveðið var að veita 5 nýjum verkefnum styrk, samtals 1.975.000 dkr.

Á sviði sjávarútvegs og auðlinda hafsins voru tvö verkefni styrkt. Verkefnið West Nordic Bioeconomy panel, sem Matís leiðir,miðar að því að skilgreina tækifæri og leggja til heildarstefnu til að styrkja lífhagkerfi svæðisins. Verkefnið The Blue Line Project, sem Arnarlax leiðir, miðar að því að búa til kennsluefni um fiskeldi fyrir ungt fólk á Íslandi og í Færeyjum. Talið er að verkefnið muni stuðla að vexti smærri byggðarlaga sem byggja á sjávarútvegi.

Á sviði ferðaþjónustu var verkefninu Kystkulturer og museer veittur styrkur. Ísland er eitt þátttökulandanna og er það Síldarminjasafnið á Siglufirði sem tekur þátt. Verkefnið leggur áherslu á sameiginlega sögu þátttökulandanna og munu samstarfsaðilarnir setja upp sameiginlega sýningu. Markmiðið er að þróa áfram hlutverk menningararfs í ferðaþjónustu á sjálfbæran hátt.

Á sviði orkumála var verkefninu North Atlantic Hydrogen Learning Network veittur styrkur. Ísland er eitt þátttökulandanna og er það Nýorka sem tekur þátt. Verkefnið miðar að því að búa til leiðarvísi um hvernig skuli byggja upp vetnisnýtingu á svæðinu. Eitt af markmiðum verkefnisins er að koma á þekkingarneti um virðiskeðju vetnis í dreifðum byggðum.

Einnig fékk Arktisk vandforsyning áframhaldandi styrk en það hófst árið 2016. Ísland er eitt þátttökulandanna og eru það Ísafjarðarbær og Háskóli Íslands sem eru þátttakendur. Markmið verkefnisins er úttekt á vatnabúskap á heimskautssvæðinu.