Fréttir

Mánudaginn 24. febrúar var haldinn síðasti formlegi fundur með þátttöku Byggðastofnunar í verkefnisstjórn Brothættra í verkefninu Hrísey, perla Eyjafjarðar. Í beinu framhaldi var haldinn íbúafundur. Stofnunin dregur sig þar með í hlé frá verkefninu.

Verkefnið hefur staðið frá seinni hluta árs 2015 undir handleiðslu verkefnisstjórans, Helgu Írisar Ingólfsdóttur. Skilgreind var verkefnisáætlun með framtíðarsýn og markmiðum sem unnið hefur verið að á verkefnistímanum og hafa mörg markmiðanna náðst eða vinna að þeim hafin. Að auki hafa verið veittir styrkir til fjölmargra frumkvæðisverkefna í samfélaginu í Hrísey og hafa flest þeirra skilað áhugaverðum niðurstöðum og árangri. Alls nema styrkir til þessara verkefna 33 milljónum króna. Var að heyra á fundarmönnum að ýmislegt hefði áunnist á verkefnistímanum. Bæði hvað varðar áður nefnd markmið í verkefnisáætlun og í hinum styrktu verkefnum.

Á fundinum kvaddi fulltrúi Byggðastofnunar heimamenn og sömuleiðis fráfarandi verkefnisstjóri, Helga Íris Ingólfsdóttir og þökkuðu fyrir samstarfið.

Íbúar Hríseyjar sem sátu fundinn eru einhuga um að byggja á þeim grunni sem kominn er og þeir munu nú, undir forystu hverfisráðsins, móta framhald verkefnisins í samstarfi við fulltrúa Akureyrarbæjar og SSNE, Samtaka sveitarfélaga og atvinnuþróunar á Norðurlandi eystra.