Fréttir

Frumkvæðisstyrkjum var úthlutað í fyrsta sinn úr Frumkvæðissjóði Fjársjóðs fjalla og fjarða þann 29. okt. sl. Úthlutunarathöfnin fór fram í Handverksmarkaði Össu í Króksfjarðarnesi og þangað mættu bæði styrkþegar og aðrir gestir. Alls bárust 21 umsókn í sjóðinn, umbeðið styrkfé nam tæpum 60 m.kr. en heildarkostnaður verkefna nam tæpum 160 m.kr. Alls hlutu 16 verkefni brautargengi í þessari fyrstu úthlutun en heildarstyrkfé til úthlutunar var 11 m.kr. Verkefnin eru fjölbreytt og segja má að frumkvæði og áhugi íbúa á verkefninu endurspeglist í fjölda umsókna.

Fjölmenn úthlutunarathöfn í Króksfjarðarnesi

Verkefnisstjóri Fjársjóðs fjalla og fjarða, Embla Dögg Bachmann, stýrði úthlutunarathöfninni, ávarpaði gesti og hvatti styrkþega til dáða í verkefnum sínum um leið og hún óskaði þeim innilega til hamingju f.h. verkefnisstjórnar. Guðlaug G.I.M. Bergsveinsdóttir, fulltrúi íbúa í verkefnisstjórn og Hrefna Jónsdóttir, fulltrúi sveitarfélags, aðstoðuðu einnig við undirbúning og framkvæmd úthlutunarathafnarinnar.

Ólafur Þór Ólafsson sveitarstjóri Reykhólahrepps ávarpaði samkomuna og óskaði styrkþegum innilega til hamingju, þakkaði fyrir góða þátttöku og hvatti íbúa til áframhaldandi nýsköpunar.

Það verður sannarlega fróðlegt að fylgjast með framvindu frumkvæðisverkefna í Reykhólahreppi og ástæða til að óska styrkþegum til hamingju og velfarnaðar í sínum verkefnum.

Frumkvæðisverkefni sem styrkt voru í úthlutun 2025:

Umsækjandi	Heiti verkefnis	Upphæð styrks (kr.)
Eydís Örk Sævarsdóttir / Gálgaklettur	Gufsan – samkomuhús	800.000
UMF Afturelding	Framkvæmdastjóri UMF Aftureldingar	1.250.000
UMF Afturelding	Allir hjóla	500.000
Félag áhugamanna um Bátasafn Breiðafjarðar á Reykhólum	Braggi á Reykhólum – endurbætur og lagfæringar	700.000
Báta- og hlunnindasýningin ehf.	Skilti – merking við Þjóðveg 60	250.000
Báta- og hlunnindasýningin ehf.	Lifandi bátasýning	600.000
Erla Þórdís Reynisdóttir	Sauma-/vinnustofa og hannyrðamiðstöð	400.000
Ferðaþjónustan Djúpadal	Fjölgun gistirýma	1.000.000
Framfarafélag Flateyjar	Eyjaþing 2026	500.000
Furðufuglar	Fuglaskilti	1.000.000
Úr sveitinni ehf. (BSF11 ehf.)	Fjós… allra meina bót…	1.000.000
Guðlaug G.I.M. Bergsveinsdóttir	Gull-Þórir á kortið	900.000
Guðlaug G.I.M. Bergsveinsdóttir	Upphaf upptöku	70.000
Handverksfélagið Assa	Kaffihús Össu, Króksfjarðarnesi	350.000
Laugavík hf.	Þaraböðin í Breiðafirði – Reykhólum	1.280.000
Þórdís Halla Sigmarsdóttir & Hrólfur Ingi S. Eggertsson	Vinnustofa til námskeiðahalds	400.000
	Upphæð alls:	11.000.000

 

Hér má sjá myndir sem teknar voru við þetta tilefni. Myndasmiður var Sveinn Ragnarsson.

Hluti styrkþega við úthlutun úr frumkvæðissjóði Fjársjóðs fjalla og fjarða.

Frá úthlutunarathöfn Fjársjóðs fjalla og fjarða.

Í Handverksmarkaði Össu í Króksfjarðarnesi.

Ólafur Þór Ólafsson, sveitarstjóri, ávarpar samkomuna.

Embla Dögg Bachmann, verkefnisstjóri Fjársjóðs fjalla og fjarða, ávarpar samkomuna.

---

Verkefnið Brothættar byggðir er ein af aðgerðum Byggðaáætlunar, C.2, og markmið þess er að spornað verði við viðvarandi fólksfækkun í smærri byggðarlögum. Verkefnið byggir á samstarfi Byggðastofnunar, viðkomandi sveitarfélags, landshlutasamtaka og síðast en ekki síst íbúa hvers þátttökubyggðarlags. Því er einkum ætlað að styðja við frumkvæði og þátttöku íbúa til hagsbóta fyrir samfélagið í víðum skilningi.