Fréttir

Frá verkefnastefnumóti NPA

Dagana 15.-16. nóvember s.l. var verkefnastefnumót íslenskra þátttakenda í verkefnum innan Norðurslóðaáætlunarinnar haldið á Hótel Hamri í Borgarnesi.

Meginmarkmið verkefnastefnumótsins var að efla tengslanet þátttakenda, kynna verkefnin sem nú eru í gangi með íslenskum þátttakendum, fara yfir helstu þætti er varðar fjárhagsuppgjör, skýrslugerð og endurskoðun verkefna og fara yfir þátttöku og fjárhagsstöðu Íslands í áætluninni.

Mikill áhugi er meðal íslenskra aðila að taka þátt í Norðurslóðaverkefnum og eru íslenskir þátttakendur eftirsóttir samstarfsaðilar. Í júlí 2016 var búið að samþykkja 27 forverkefni og eru íslenskir aðilar þátttakendur í sjö verkefnum. Samtals er búið að styrkja 25 aðalverkefni og þar af eru íslenskir þátttakendur í 13 og fara íslenskir aðilar með verkefnisstjórn í tveimur aðalverkefnum. Háskóli Íslands stýrir verkefninu Smart Fish sem vinnur að þróun og hönnun á snjallstrikamiðum sem eiga að tryggja rekjanleika og ferskleika sjávarafurða frá framleiðanda til neytenda. Matís fer með verkefnisstjórn í Cereals í verkefninu er unnið að því að rannsaka og þróa nýjar aðferðir við kornrækt á norðurslóðum og aðstoða frumkvöðla við vöruþróun og markaðssetningu á nýjum afurðum úr korni, drykkjar- og matvörur. 

Nálgast má verkefnakynningar og fyrirlestra undir dagskrárliðum verkefnastefnumótsins hér.

Á sama tíma og góðri þátttöku íslenskra aðila í Norðurslóðaáætluninni ber að fagna eru miklar líkur á aðeins verði hægt að styrkja þrjú til fjögur ný aðalverkefni með íslenskri þátttöku ef ekki fæst meira fjáramagn. Ísland er búið að ráðstafa um 78% af fjármagninu sem stjórnvöld hafa samþykkt að verja til íslenskra aðila til ársins 2020.

Meginmarkmið Norðurslóðaáætlunarinnar er að stuðla að bættu atvinnu- og efnahagslífi og að eflingu búsetuþátta og mannauðs með fjölþjóðlegu samstarfi. Áherslur áætlunarinnar eru á nýsköpun, frumkvöðlastarfsemi, endurnýjanlega orkugjafa og orkusparnað og verndun náttúru og menningu og hagkvæma nýtingu auðlinda á norðurslóðum. Meginforsenda að verkefni er styrkt er að það skili af sér afurð, vöru og/eða þjónustu sem bætir lífsgæði þeirra sem búa á starfssvæði áætlunarinnar.

Á heimasíðu NPA www.interreg-npa.eu eru nánari upplýsingar um áherslur, markmið, leiðbeiningar, árangursmælikvarða og skýrslur, m.a. um afurðir og árangur verkefna úr fyrri áætlun (NPP) sem og núverandi Norðurslóðaverkefni.

Landstengiliður Íslands er Sigríður Elín Þórðardóttir; netfang sigridur@byggdastofnun.is sími 4555400.