Fréttir

Frá fundi verkefnisstjóra í byggðaþróunarverkefnum

Samheldinn hópur verkefnisstjóra í byggðaþróunarverkefninu Brothættum byggðum og sambærilegum verkefnum hittust á fundi á Hótel Örk 22. – 23. nóvember sl. Í hverjum mánuði hittist hópurinn í netheimum og ræðir málefni sem sameiginleg eru byggðarlögunum í því skyni að deila góðu verklagi. Í þessu tilviki var hins vegar ákveðið að koma saman og halda fund. Staðfundur líkt og þessi gefur góð tækifæri til að skiptast á skoðunum, gefa góð ráð og leita sóknarfæra í sameiningu. Á fundinum var meðal annars skerpt á verklagi í Brothættum byggðum samkvæmt verkefnislýsingu. Rætt var um lokaáfanga verkefna og hvað tekur við eftir að Byggðastofnun dregur sig formlega í hlé úr verkefnum í hverju byggðarlagi.

Á fundinn komu góðir gestir með áhugaverð erindi. Sigurborg Kr. Hannesdóttir ráðgjafi frá Ildi leiddi hópinn í umræðum um þátttöku íbúa í byggðaþróunarverkefnum, fyrirkomulag íbúafunda og hvernig mætti laða fram virkni íbúa til þátttöku. Elmar Erlendsson sérfræðingur hjá Húsnæðis- og mannvirkjastofnun (HMS) kynnti leiðir varðandi húsnæðisuppbyggingu undir hatti verkefnisins Tryggð byggð. Öll byggðarlögin eiga það m.a. sammerkt að íbúðarhúsnæði skortir og gafst gott tækifæri til samræðu um lausnir og leiðir þar sem HMS gæti komið að borðinu. Það var samdóma álit verkefnisstjóra að vettvangur sem þessi sé afar dýrmætur þar sem tækifæri gefst til umræðu um byggðaþróun á Íslandi í víðu samhengi en þó með áherslu á fámennari byggðarlögin sem átt hafa undir högg að sækja.

Hér má sjá myndir frá fundinum. Myndasmiður var Kristján Þ. Halldórsson hjá Byggðastofnun.