Fréttir

Ákveðið hefur verið að framlengja umsóknarfrest vegna styrkja Byggðastofnunar til meistaranema sem vinna að lokaverkefnum á sviði byggðaþróunar til 14.nóvember n.k., en frestur rann út þann 1. nóv. s.l.

Þriðjudaginn 8. nóvember verður haldinn opinn fundur á Hótel Berjaya Héraði á Egilsstöðum um atvinnuuppbyggingu og þróun íbúðarmarkaðar á landsbyggðinni. Fundurinn verður haldinn á Hótel Berjaya Héraði á Egilsstöðum kl.12 og er opinn öllum. Að fundinum standa ýmsir aðilar sem láta sig varða uppbyggingu á landsbyggðinni eða Austurbrú, HMS, Byggðastofnun, Lóa nýsköpunarstyrkur og Samtök iðnaðarins. Á fundinum verður tekið fyrir hvernig atvinna er að þróast á landsbyggðinni, hver staðan er á íbúðamarkaði, lánaúrræði sem standa til boða og eru ætluð til að stuðla að aukinni íbúðauppbyggingu, nýsköpunarstyrkir og fleira.

Ársskýrsla byggðaþróunarverkefnisins Brothættar byggðir fyrir starfsárið 2021 hefur verið gefin út. Skýrslan gefur yfirlit yfir framvindu verkefna í þeim sex byggðarlögum sem voru þátttakendur í verkefninu á árinu 2021.

Opið er fyrir umsóknir í öðru kalli Norðurslóðaáætlunarinnar frá 5. október – 5. desember 2022 á öllum þremur forgangssviðum áætlunarinnar. Sérstök athygli er vakin á forgangssviði 3 sem er að Styrkja stofnanagetu samfélaga á starfssvæði áætlunarinnar til að nýta sér samstarfsverkefni.

Þema ársfundarins að þessu sinni er Ungt fólk á Norðurslóðum – þáttur ungs fólks í að gera afskekkt samfélög aðlaðandi. Fundurinn fer að þessi sinni fram í Bodø í Noregi miðvikudaginn 9. nóvember.

Byggðastofnun leitar að öflugum og traustum einstaklingi til starfa sem forstöðumaður fyrirtækjasviðs. Starfsstöð er í nýjum og glæsilegum höfuðstöðvum stofnunarinnar á Sauðárkróki. Viðkomandi þarf að hafa brennandi áhuga á byggðamálum og metnað til þess að jafna tækifæri landsmanna allra til atvinnu og búsetu. Forstöðumaður fyrirtækjasviðs er jafnframt staðgengill forstjóra og varaformaður lánanefndar. Æskilegt er að umsækjandi geti hafið störf sem fyrst.

Byggðastofnun tók þátt í ráðstefnu OECD um byggðaþróun sem fram fór í Cavan sýslu á Írlandi í síðustu viku. Þema ráðstefnunnar í ár var sjálfbærar, sterkar og blómlegar dreifðar byggðir og má segja að jákvæðnin, framsýnin og drifkrafturinn hafi nánast verið áþreifanlegur hjá fundargestum og framsögufólki.

Íbúar Stöðvarfjarðar og fulltrúar Fjarðabyggðar fjölmenntu á íbúafund í grunnskólanum sl. fimmtudagskvöld þar sem drög að verkefnisáætlun fyrir verkefnið Sterkan Stöðvarfjörð lágu fyrir til umræðu og samþykktar. Um nokkurt skeið hefur verkefnisstjóri, Valborg Ösp Árnadóttir Warén, ásamt verkefnisstjórn unnið að mótun verkefnisáætlunarinnar á grunni skilaboða íbúaþings sem haldið var í mars sl. og stöðugreiningar verkefnisstjórnar.

Sigurður Ingi Jóhannsson, innviðaráðherra, hefur skipað Arnar Má Elíasson forstjóra Byggðastofnunar til næstu fimm ára.

Byggðastofnun hefur frá áramótum 2013/2014 gert árlega könnun á staðsetningu starfa á vegum ríkisins. Fyrir liggja nú tölur um fjölda stöðugilda við áramót 2021/2022. Stöðugildin voru 26.610 þann 31. desember 2021, þar af voru 17.100 skipuð af konum og 9.511 af körlum. Á árinu 2021 fjölgaði stöðugildum um 1.328 á landsvísu eða 5,3%. Þetta er mesta fjölgun milli ára frá því Byggðastofnun hóf að greina fjölda ríkisstarfa.