Fréttir

Stýrihópur Stjórnarráðsins um byggðamál sendi nýverið frá sér greinargerð um framvindu samninga og ráðstöfun fjármuna árið 2015. Í öllum landshlutum hefur verið unnið að sóknaráætlunum frá árinu 2013 og í byrjun árs 2015 undirrituðu ráðherra sjávarútvegs, landbúnaðar og byggðamála og ráðherra mennta- og menningarmála samninga við öll landshlutasamtök sveitarfélaga um sóknaráætlanir fyrir árin 2015-2019.

Á grundvelli sóknaráætlana er unnið að fjölbreyttum verkefnum um allt land. Verkefnin skiptast annars vegar í áhersluverkefni, sem eru á ábyrgð landshlutasamtaka og hins vegar verkefni sem uppbyggingarsjóður hvers landshluta styrkir.  Árið 2015 var unnið að samtals 39 áhersluverkefnum. Framlag til þeirra úr sóknaráætlunum var 222 milljónir. Í öllum landshlutum, fyrir utan höfuðborgarsvæðið, eru starfræktir uppbyggingarsjóðir sem eru samkeppnissjóðir. Árið 2015 voru alls 606 verkefni styrkt að heildarupphæð um 457 milljónir. Samkvæmt úthlutunarreglum er mótframlag styrkþega að lágmarki sama upphæð og veittur styrkur. Þannig má áætla að um 1 milljarður hafi runnið til verkefna uppbyggingarsjóða á árinu.

Þetta og miklu meira má lesa um í greinargerð stýrihópsins sem má nálgast hér.

Formaður stýrihópsins Stjórnarráðsins um byggðamál er Hanna Dóra Hólm Másdóttir, atvinnuvega- og nýsköpunarráðuneytinu og verkefnisstjóri er Hólmfríður Sveinsdóttir, Byggðastofnun.