Fréttir

NPA_forverkefni2022

Norðurslóðaáætlunin 2021-2027 mun opna fyrir umsóknir um undirbúnings- eða forverkefni þann 2. ágúst og verður opið fyrir umsóknir til 19. september. Umsóknir verða svo afgreiddar 23. nóvember. Eins og nafnið bendir til er verkefnunum ætlað að vera til undirbúnings aðalverkefna, þ.e. til að þróa verkefnahugmyndir, leita hugsanlegra samstarfsaðila og skoða fjármögnunarmöguleika aðalverkefna.

Reynslan sýnir að undirbúningsverkefnin eru mikilvæg til að þróa sterkar aðalumsóknir og eru bæði reyndir og óreyndir aðilar hvattir til að nýta þetta tækifæri til að efla tengslanet sitt og þróa verkefnahugmyndir. Leitað er eftir verkefnum sem falla undir forgangssvið 1 - Styrkja nýsköpunarhæfni þrautseigra og aðlaðandi samfélaga.  og 2 - Styrkja getu samfélaga til að laga sig að loftslagsbreytingum og bættri auðlindanýtingu.

Stærð verkefna er annars vegar allt að 50 þús. evrur til sex mánaða eða 100 þús. evrur til tólf mánaða. Styrkurinn, sem er 65% af heildarkostnaði verkefna, er greiddur út í einu lagi að verkefni loknu. Þátttakendur þurfa að vera frá a.m.k. tveimur löndum, þar af einu innan ESB og helst frá a.m.k. tveimur af þremur landfræðilegum svæðum áætlunarinnar; Finnlandi-Svíþjóð-Noregi; Írlandi; Færeyjum-Íslandi-Grænlandi.

Horft er til þess að forverkefni sem fá brautargengi að þessu sinni ljúki með umsókn í þriðja eða fjórða kalli eftir aðalverkefnum á árinu 2023.

Allar frekari upplýsingar eru á heimasíðu áætlunarinnar og einnig má hafa samband við landstengilið áætlunarinnar, Reinhard Reynisson á netfanginu reinhard@byggdastofnun.is