Fréttir

Frá afhendingunni. Mynd: Sveinn Ragnarsson

Þann 10. júní sl. fór fram úthlutunarathöfn Frumkvæðissjóðs Fjársjóðs fjalla og fjarða. Að þessu sinni fór athöfnin fram í Bjarkarlundi. Vel var mætt og ríkti gleði og bjartsýni meðal gesta. Verkefnið Fjársjóður fjalla og fjarða er hluti af Brothættum byggðum.

Fjöldi umsókna

Alls bárust 32 umsóknir í frumkvæðissjóðinn að þessu sinni sem ber vitni um þann kraft og frumkvöðlaanda sem býr í íbúum og samfélaginu í Reykhólahreppi. Heildarupphæð umsókna nam 56.000.700 kr. og samanlagður heildarkostnaður verkefnanna var 163.810.600 kr.

Af þeim umsóknum sem bárust hlutu 30 verkefni styrk og var samtals úthlutað 11.500.000 kr. úr sjóðnum. Verkefnin sem hlutu styrk eru fjölbreytt og endurspegla þann metnað og sköpunarkraft sem einkennir samfélagið, allt frá menningar- og samfélagsverkefnum til atvinnuuppbyggingar, nýsköpunar og ferðaþjónustu.

Þakkir til verkefnisstjóra

Embla Dögg Bachmann verkefnisstjóri stýrði úthlutunarathöfninni af myndugleik en hún hefur sagt starfi sínu lausu og hyggst hverfa til annarra verkefna. Eru henni þökkuð góð störf í þágu Fjársjóðs fjalla og fjarða á þessu fyrsta starfsári verkefnisins og gott samstarf.

Styrkþegar 2026

Verkefnisstjórn Fjársjóðs fjalla og fjarða óskar öllum styrkþegum innilega til hamingju með styrkina og hlakkar til að fylgjast með framgangi verkefnanna á komandi misserum. Verkefni sem hlutu brautargengi að þessu sinni eru eftirfarandi:

Hér má sjá myndir sem teknar voru af þessu tilefni. Myndasmiður var Sveinn Ragnarsson.

Styrkþegar 2026 ásamt fulltrúum verkefnisstjórnar Fjársjóðs fjalla og fjarða.

Embla Dögg Bachmann verkefnisstjóri og Hrefna Jónsdóttir fulltrúi Reykhólahrepps í stjórn FFF.

Afhending frumkvæðisstyrks.

Verkefnið er ein af aðgerðum Byggðaáætlunar, C.2, og markmið þess er að spornað verði við viðvarandi fólksfækkun í smærri byggðarlögum. Verkefnið byggir á samstarfi Byggðastofnunar, viðkomandi sveitarfélags, landshlutasamtaka og síðast en ekki síst íbúa hvers þátttökubyggðarlags. Því er einkum ætlað að styðja við frumkvæði og þátttöku íbúa til hagsbóta fyrir samfélagið í víðum skilningi.