Fréttir

Mánudaginn 24. júní var formlega opnuð verslun í Norðurfirði í Árneshreppi að viðstöddu fjölmenni í blíðskapar veðri. Samgöngu- og sveitarstjórnarráðherra opnaði verslunina og afhjúpaði nýtt skilti með merki félagsins og gestum var boðið til kaffiveislu.

Rekstri verslunar var hætt á seinni hluta síðasta árs og því engin verslun í Árneshreppi síðastliðinn vetur. Heimamenn tóku sig til og stofnuðu nýtt félag, Verzlunarfjelag Árneshrepps og fengu mjög jákvæð viðbrögð heimamanna og annarra velunnara Árneshrepps varðandi þátttöku í félaginu. Skúli Gautason verkefnisstjóri í verkefninu Áfram Árneshreppur aðstoðaði stjórnina við stofnun félagsins og undirbúning að verslunarrekstri en formaður stjórnar er Arinbjörn Bernharðsson. Verkefnið Áfram Árneshreppur hefur stutt við verslunarrekstur í sveitarfélaginu og þá úthlutaði samgöngu- og sveitarstjórnarráðherra styrk í desember 2018 til verslunarreksturs í Árneshreppi á grundvelli stefnumótandi byggðaáætlunar fyrir árin 2018-2024.

Árný Björk Björnsdóttir frá Melum í Trékyllisvík hefur verð fengin til að sjá um reksturinn í sumar. Það var vel við hæfi að ráðherra var einn af fyrstu viðskiptavinunum sem Árný Björk afgreiddi.

Myndirnar með fréttinni tók Kristján Þ. Halldórsson, Byggðastofnun.