Fréttir

Frá Hestfirði

Ársfundur Vestfjarðastofu var haldinn á Ísafirði þriðjudaginn 14. júní síðastliðinn. Til umræðu á fundinum voru framtíðarhorfur atvinnulífs og samfélaga á Vestfjörðum með yfirskriftina Vestfirðir í vörn eða sókn?

Sigríður Elín Þórðardóttir forstöðumaður þróunarsviðs Byggðastofnunar fjallaði þar um sókn atvinnulífs og samfélags og tengdi efnið við þróun hagvaxtar og atvinnutekna í landshlutanum, sóknarfæri í fiskeldi og ferðaþjónustu og áskoranir í samgöngumálum og raforkukerfi Vestfjarða.

Glærur frá erindi Sigríðar Elínar má finna hér.

Sigurður Hannesson frá Samtökum Iðnaðarins fjallaði um hlutverk samtakanna og sameiginlega hagsmuni tengda aukinni verkmenntun, uppbyggingu innviða og fleira.

Þá fjallaði Heiðrún Lind Marteinsdóttir frá Samtökum fyrirtækja í sjávarútvegi um sviðsmyndir tengdar aukinni verðmætasköpun sjávarútvegs og fiskeldis sem líkur eru á að verði að verulegu leyti tengd Vestfjörðum.

Svanhildur Hólm Valsdóttir vakti athygli á mikilvægi þess að gætt sé að samkeppnisstöðu samfélaga og loks fjallaði Jóhannes Þór Skúlason framkvæmdastjóri Samtaka ferðaþjónustunnar um nýtt mælaborð SAF.

Á fundinum kynntu Runólfur Ágústsson framkvæmdarstjóri Ráðgjafar og verkefnastjórnunar og Valdimar Ármann forstöðumaður eignastýringar hjá Artica Finance, áform um stofnun fjárfestingarsjóðsins Þuríðar. Sjóðurinn mun sérhæfa sig í fjárfestingum í ferðaþjónustu á Vestfjörðum og hafa allt að 12 milljarða fjárfestingargetu. Sjóðurinn verður stofnaður á næstu vikum og er vonast til að breiður hópur fjárfesta muni standa að hópnum.