Fréttir

Ársreikningur Byggðastofnunar fyrir árið 2019, var staðfestur af stjórn stofnunarinnar 20. mars 2020

Hagnaður ársins nam 95,4 milljónum króna.  Eiginfjárhlutfall í lok árs skv. eiginfjárákvæðum laga nr. 161/2002 um fjármálafyrirtæki var 19,25%.

Um stofnunina gilda lög um Byggðastofnun nr. 106/1999 og reglugerð nr. 347/2000. Hlutverk Byggðastofnunar er að efla byggð og atvinnulíf með sérstakri áherslu á jöfnun tækifæra allra landsmanna til atvinnu og búsetu. Í samræmi við hlutverk sitt undirbýr, skipuleggur og fjármagnar stofnunin verkefni og veitir lán með það að markmiði að treysta byggð, efla atvinnu og stuðla að nýsköpun í atvinnulífi. Fjármögnun verkefna skal eftir föngum vera í samstarfi við aðra. Stofnunin skipuleggur og vinnur að atvinnuráðgjöf í samstarfi við atvinnuþróunarfélög, sveitarfélög og aðra haghafa.  Byggðastofnun fylgist með þróun byggðar í landinu, m.a. með gagnasöfnun og rannsóknum. Stofnunin getur gert eða látið gera áætlanir um þróun byggðar og atvinnulífs í þeim tilgangi að treysta búsetu og atvinnu í byggðum landsins.

Helstu niðurstöður úr ársreikningi Byggðastofnunar 2019

• Hagnaður ársins nam 95,4 milljónum króna.
• Eiginfjárhlutfall skv. lögum um fjármálafyrirtæki var 19,25% en skal að lágmarki vera 8% auk 1,75% sveiflujöfnunarauka og 2,5% verndunarauka, eða samtals 12,25%.  Þann 1.febrúar 2020 hækkaði sveiflujöfnunarauki í 2,0% þannig að samanlögð krafa um eiginfjárauka er 12,5% frá 1. febrúar 2020.  Þann 18. mars 2020 ákvað Fjármálastöðuleikanefnd Seðlabanka Íslands að aflétta 2% kröfu um sveiflujöfnunarauka fjármálafyrirtækja.
• Hreinar vaxtatekjur voru 509,5 milljónir króna eða 43,5% af vaxtatekjum, samanborið við 467,8 milljónir króna (42,6% af vaxtatekjum) hreinar vaxtatekjur árið 2018.
• Laun og annar rekstrarkostnaður nam 551,4 milljónum króna samanborið við 520,1 milljón árið 2018.
• Eignir námu 16.475 milljónum króna og hafa hækkað um 1.589 milljónir frá árslokum 2018.  Þar af voru útlán og fullnustueignir 13.850 milljónir samanborið við 12.113 milljónir í árslok 2018.
• Skuldir námu 13.259 milljónum króna og hækkuðu um 1.494 milljónir á árinu.

Horfur

Eiginfjárstaða stofnunarinnar er áfram sterk og gefur henni færi á að vera öflugur bakhjarl atvinnulífs á landsbyggðinni. 

Byggðastofnun hefur reynt að meta áhrif COVID-19 veirunnar á lánasafn stofnunarinnar en talið er að áhrifin verði mest hjá lántakendum hennar í ferðaþjónustu, en lán til þeirrar greinar nema um 4 milljörðum króna. Stofnunin telur að áhrifin geti haft allt að 500 mkr. neikvæð áhrif á sjóðstreymi á árinu 2020, að því gefnu að ekkert verði greitt af lánum í ferðaþjónustu og allt að 500 mkr. á árinu 2021 og hefur samgöngu- og sveitarstjórnarráðuneytinu verið gerð grein fyrir því. Áhrifin verða fyrst mest á sjóðstreymi stofnunarinnar en gætu orðið seinna á rekstur og efnahag. Stofnunin er þó vel í stakk búin að mæta þessu áfalli þar sem efnahagur hennar er sterkur og hún hefur næga lántökuheimild.

Þá mun ákvörðun Fjármálastöðuleikanefndar Seðlabanka Íslands um að aflétta 2% kröfu um sveiflujöfnunarauka á fjármálafyrirtæki auðvelda stuðning stofnunarinnar við fyrirtæki sem lenda í vanda.

Nánari upplýsingar

Nánari upplýsingar veitir Aðalsteinn Þorsteinsson, forstjóri Byggðastofnunar í síma 455 5400 eða á netfanginu adalsteinn@byggdastofnun.is

Ársreikningur 2019