Fréttir

Hríseyjarbúðin

Eyjólfur Ármannsson innviðaráðherra hefur staðfest tillögur valnefndar um verkefnastyrki til verslana í dreifbýli. Að þessu sinni var átján milljónum kr. úthlutað til sex verslana í dreifbýli fyrir árið 2026. Í tveimur tilvikum verða styrkirnir nýttir til opna verslun að nýju, á Stöðvarfirði og Þingeyri.

Markmiðið með styrkjunum er að styðja við dagvöruverslanir í minni byggðarlögum fjarri stórum byggðakjörnum á fámennum markaðssvæðum til að viðhalda mikilvægri grunnþjónustu. Ýmist eru veittir rekstrarstyrkir eða styrkir til endurbóta eða sjálfvirknivæðingar. Styrkirnir eru veittir á grundvelli stefnumótandi byggðaáætlunar fyrir árin 2022-2036. 

Samtals bárust tíu umsóknir fyrir samtals 64,4 m.kr. Eftirtaldar verslanir fengu styrki:

• B12-Bryggjan ehf. á Þingeyri – 4 m.kr. vegna opnunar verslunar.
• Bakka-Búðin ehf. á Reykhólum – 3 m.kr. vegna rekstrar.
• Hríseyjarbúðin ehf – 3 m.kr. vegna rekstrar.
• Stöðfirska verzlunarfélagið ehf – 2 m.kr. vegna opnunar verslunar á Stöðvarfirði.
• Verslunarfélag Drangsness ehf – 3 m.kr. vegna rekstrar.
• Verzlunarfjelag Árneshrepps ehf – 3 m.kr. vegna rekstrar í Norðurfirði.

Þriggja manna valnefnd fór yfir umsóknirnar og gerðu tillögur til ráðherra. Í valnefnd sátu þau Elín Gróa Karlsdóttir, verkefnisstjóri hjá Ferðamálastofu, Sigurður Árnason, sérfræðingur á Byggðastofnun, sem jafnframt er formaður og Snorri Björn Sigurðsson fyrrverandi forstöðumaður þróunarsviðs Byggðastofnunar. Skipun valnefndar og mat umsókna voru í samræmi við reglur um úthlutun innviðaráðherra á framlögum sem veitt eru á grundvelli stefnumótandi byggðaáætlunar fyrir árin 2022-2036.

Frétt af vef stjórnarráðsins.