Fréttir

Dagskrá ársfundarins

Við höldum áfram að kynna dagskrá ársfundar Byggðastofnunar sem haldinn verður fimmtudaginn 28. maí nk. í félagsheimilinu Kirkjuhvoli á Kirkjubæjarklaustri.

Meðal erinda á ársfundinum verður samanburðarrannsókn Ara Klængs Jónssonar, Beinar og óbeinar byggðaaðgerðir og þróun mannfjölda í átta sveitarfélögum en verkefnið er eitt af sex verkefnum sem fengu styrk úr Byggðarannsóknarsjóði árið 2024.

Verkefnið snýr að því að greina íbúaþróun í átta sveitarfélögum og setja hana í samhengi við uppbyggingu atvinnugreina á svæðunum sem um ræðir og beinar og óbeinar byggðaaðgerðir sem ráðist hefur verið í. Verkefnið varpar ljósi á breytingar á stærð og samsetningu mannfjöldans á hverju svæði fyrir sig með tilliti til lýðfræðibreyta, tekna og menntunarstöðu og þróun þessara breyta yfir fyrirfram skilgreind tímabil og í samanburði við landið í heild sinni. Tilgangur rannsóknarinnar var tvíþættur. Annars vegar sá að varpa ítarlegu ljósi á íbúaþróun yfir langt tímabil á völdum svæðum hringinn í kringum landið og hins vegar að setja þá þróun í samhengi við aðgerðir sem ráðist hefur verið í og ættu að hafa áhrif á samsetningu og stærð mannfjöldans á hverjum stað fyrir sig, með beinum eða óbeinum hætti.

Annar dagskrárliður á ársfundi Byggðastofnunar er veiting styrkja úr Byggðarannsóknasjóði fyrir árið 2026. Tilgangur sjóðsins er að efla byggðarannsóknir og bæta þekkingargrunn fyrir stefnumótun og aðgerðir í byggðamálum og fer Byggðastofnun með umsýslu sjóðsins.