Fréttir

Mynd: ÓÁR.

Nýlega var styrkjum úthlutað úr Frumkvæðissjóði Brothættra byggða í verkefninu Betri Bakkafjörður. Er þetta í þriðja sinn sem fjármagni er veitt úr sjóðnum í byggðalaginu. Alls bárust 14 umsóknir í sjóðinn að þessu sinni og heildarfjárhæð umsókna var 76,5 milljónir króna. Til úthlutunar í ár voru samtals 13,9 m.kr. og var þeim veitt til átta samfélagseflandi verkefna. Þess ber þó að geta að inni í þeirri tölu eru fjármunir sem ekki nýttust að fullu í fyrri verkefnum og komu því til endurúthlutunar nú. Verkefnin sem hlutu styrk að þessu sinni voru mjög fjölbreytt og hafa það öll að markmiði að styrkja innviði Bakkafjarðar, skapa atvinnu og stuðla að sterkari stöðu byggðarlagsins í samræmi við stefnumótun fyrir verkefnið sem samþykkt var á íbúafundi haustið 2019.

Frá því að verkefnið hóf göngu sína árið 2019 hafa samtals 23 verkefni hlotið styrki að upphæð samtals 27,5 m.kr. Auk þess var sérstöku framlagi veitt í þjónustukjarna og gistiheimili að upphæð 9 m.kr. og hefur því samtals 36,5 m.kr. verið veitt til samfélagseflandi verkefna í byggðalaginu undir merkjum Betri Bakkafjarðar frá upphafi. Til viðbótar má nefna að 1,5 m.kr. var úthlutað til verslunar í strjálbýli í tengslum við byggðaáætlun  á árinu 2019.

Yfirlit yfir styrkt verkefni má sjá á heimasíðu Byggðastofnunar hér.

Myndin er tekin við úthlutun styrkja á Bakkafirði 6. maí sl.