Fara í efni  

Fréttir

Búum til betri byggđ

Þróunarsvið Byggðastofnunar stóð í vetur fyrir verkefnavinnu um búsetuþætti á landsbyggðinni í samvinnu við atvinnuþróunarfélögin á landsbyggðinni. Fulltrúar frá ýmsum sveitarfélögum tóku einnig þátt í verkefninu, ásamt fulltrúum frá Háskólanum á Akureyri, Háskóla Íslands og Sambandi íslenskra sveitarfélaga.

Grundvöllur verkefnisins er að ekki nægir að líta á atvinnumálin ein sér sem skilyrði fyrir búsetu. Rannsóknir sýna að svokallaðir búsetuþættir hafa einnig mikil áhrif á ákvarðanir fólks um búsetu sína. Þeir búsetuþættir sem fjallað var um í verkefninu voru; menning og afþreying, sjálfsmynd og ímynd, húsnæðismál, menntun, umhverfis og skipulagsmál, félagsleg þjónusta, verslun og þjónusta, samgöngur og fjarskipti.

Haldnir voru átta fundir á Byggðabrúnni, fjarfundabrú Byggðastofnunar, einn um hvern búsetuþátt sem um var fjallað. Fyrir fundina unnu atvinnuráðgjafar í öllum landshlutum stöðumat á viðkomandi búsetuþætti á sínu starfsvæði í samráði við starfsfólk sveitarfélaga. Reynt var að samræma þessa vinnu milli landshluta með því að útbúa gátlista og spurningalista.

Á fjarfundunum kynntu atvinnuráðgjafarnir yfirlit á stöðu málaflokksins í sínum landshluta og sérfræðingum um það málefni sem var til umræðu hverju sinni var boðið að sitja fundina. Þá voru einnig settar fram tillögur í viðkomandi málaflokkum.

Fundum um öll málefni lauk um miðjan mars. Í apríl hittist samstarfshópurinn á Vorfundi atvinnuráðgjafa og tók afstöðu til einstakra tillagna sem fram komu í vinnuferlinu, og gerði tillögur að framhaldsverkefnum sem atvinnuþróunarfélögin og þróunarsvið Byggðastofnunar geta unnið áfram. Auk þessa ályktaði fundurinn um ýmis málefni sem ekki er á okkar færi að takast á við en talin eru mjög mikilvæg fyrir þróun búsetu í landinu. Tekið skal fram að um er að ræða ályktanir þeirra starfsmanna atvinnuþróunarfélaganna og Byggðastofnunar sem skipuðu samstarfshópinn og sátu vorfund atvinnuþróunarfélaganna.


Til baka

Skráning á póstlista

  • Byggđastofnun  |  Ártorg 1  |  550 Sauđárkrókur 
  • Sími 455-5400
  • postur@byggdastofnun.is
  • Opiđ frá kl. 8:30-16:00  | kt. 450679-0389