Fréttir

Stjórn Byggðastofnunar tók þá ákvörðun 18. október sl. að lækka álag á óverðtryggða vexti landbúnaðarlána um 1 prósentustig þannig að vaxtakjör slíkra lána verða REIBOR+2,5%. Þá var ákveðið að lækka álag á óverðtryggða vexti lána til kynslóðaskipta í landbúnaði, lán sem falla undir COSME ábyrgðasamkomulag Evrópska fjárfestingasjóðsins, um 1,3 prósentustig og verða kjörin REIBOR+2,0%. Breytingarnar taka gildi 1. nóvember.

Í ljósi sérstaklega erfiðrar stöðu í landbúnaði um þessar mundir vegna hækkandi fjármagnskostnaðar og aðfangaverðs tók stjórn Byggðastofnunar ákvörðun um að fara í þessa aðgerð til að mæta bráðum vanda í greininni. Þá hefur núverandi umhverfi gert endurnýjun í greininni erfitt um vik og hugsanlegt að bújörðum fari ört fækkandi á næstu misserum ef umhverfið helst óbreytt.

Hlutverk Byggðastofnunar er að vinna að eflingu byggðar og atvinnulífs í landsbyggðunum. Í samræmi við hlutverk sitt vinnur stofnunin að undirbúningi, skipulagi og fjármögnun verkefna og veitingu lána með það að markmiði að treysta byggð, efla atvinnu og stuðla að nýsköpun í atvinnulífi.