Fréttir

Eyjólfur Ármannsson innviðaráðherra hefur úthlutað rúmum 27 milljónum kr. í styrki til 14 verkefna til að styðja við uppbyggingu vinnustaðaklasa á landsbyggðinni. Styrkirnir eru veittir á grundvelli byggðaáætlunar (aðgerð B.7 – Óstaðbundin störf). Markmiðið er að fjölga atvinnutækifærum og auka fjölbreytileika starfa á landsbyggðinni. Þetta er í annað sinn sem styrkir eru veittir sérstaklega til að efla vinnustaðaklasa á landsbyggðinni, en í mars sl. úthlutaði ráðherra fimmtíu milljónum til 26 vinnustaðaklasa.

Vinnustaðaklasi er skilgreindur sem skipulagt og samnýtt vinnurými þar sem fjölbreytt vinnuaðstaða stendur til boða fyrir fleiri en einn vinnustað eða starfsstöðvar vinnustaða. Styrkhæfir voru aðilar sem reka vinnustaðaklasa utan höfuðborgarsvæðisins.

Styrkir skiptist í ólíka flokka eftir svæðum, íbúafjölda og eftir því hversu rótgróin starfsemin er. Í forgangi voru minni staðir þar sem atvinnulíf er einhæft, svæði sem hafa orðið fyrir verulegum áföllum í atvinnulífi eða svæði á fámennum vinnusóknarsvæðum.

Yfirlit yfir styrkþega

Eftirtalin verkefni hlutu styrk til að byggja upp vinnustaðaklasa og styðja við sjálfbærni þeirra.

Forgangsröðun a. Ný uppbygging á forgangssvæði:

• Samvinnuhús á Stöðvarfirði. Umsækjandi: Sköpunarmiðstöðin. Styrkur: 2.462.313 kr.
• Kaupvangur á Vopnafirði. Umsækjandi: Vopnafjarðarhreppur. Styrkur: 4.000.000 kr.
• Golan í Grindavík. Umsækjandi: Grindavíkurbær. Styrkur: 4.000.000 kr.

Forgangsröðun b. Fjölgun plássa á forgangssvæði:

• Kaupvangur á Vopnafirði. Umsækjandi: Vopnafjarðarhreppur. Styrkur: 624.000 kr.

Forgangsröðun c. Rekstrarstyrkur á forgangssvæði:

• Þróunarsetrið á Hólmavík. Umsækjandi: Strandabyggð. Styrkur: 1.000.000 kr.
• Samvinnurými á Stöðvarfirði. Umsækjandi: Sköpunarmiðstöðin. Styrkur: 1.000.000 kr.
• Skuldarhalli á Vopnafirði. Umsækjandi: Skuldarhalli ehf. Styrkur: 1.000.000 kr.

Forgangsröðun d. Ný uppbygging á miðlungssvæði:

• Verbúðin í Bolungarvík. Umsækjandi: Rörás ehf. Styrkur: 4.000.000 kr.
• Vinnustaðaklasinn í Hofsós frystihúsi. Umsækjandi: Hofsós frystihús ehf.  Styrkur: 4.000.000 kr.

Forgangsröðun e. Framlag vegna nýrra plássa gegn langtímaskuldbindingu:

• Engar umsóknir bárust vegna framlaga vegna nýrra plássa í þessari forgangsröðun.

Forgangsröðun f. Rekstrarstuðningur á miðlungssvæðum:

• Gamli bankinn á Ísafirði. Umsækjandi: Fljót ehf. Styrkur: 1.000.000 kr.
• Samvinnurými Röst á Hellissandi. Umsækjandi: Snæfellsbær. Styrkur: 1.000.000 kr.

Forgangsröðun g. Einskiptisframlag vegna nýrrar starfsemi á vinnusóknarsvæðum sem telja fleiri en 10.000 manns:

• Ein umsókn barst sem ekki var samþykkt.

Forgangsröðun g. Rekstrarstuðningur á vinnusóknarsvæðum sem telja fleiri en 10.000 manns:

• Fjölheimar á Selfossi. Umsækjandi: Háskólafélag Suðurlands á Selfossi. Styrkur: 1.000.000 kr.
• Konvin-setrið að Ásbrú í Reykjanesbæ. Umsækjandi: Konvin ehf. Styrkur: 1.000.000 kr.
• Rýmið á Akranesi. Umsækjandi: Muninn kvikmyndagerð ehf. Styrkur: 1.000.000 kr.

Umsóknarfrestur var til 23. september sl. og alls bárust 19 umsóknir um styrki að upphæð tæpum 69 milljónum. Þriggja manna valnefnd var falið að meta allar umsóknir og gerði tillögu til ráðherra um úthlutun styrkja. Fjallað er um hlutverk og skipan valnefndar og mat umsókna í reglum um úthlutun innviðaráðherra á framlögum sem veitt eru á grundvelli stefnumótandi byggðaáætlunar fyrir árin 2022-2036.

• Nánar um verkefnið óstaðbundin störf í aðgerðaáætlun byggðaáætlunar
• Reglur um úthlutun innviðaráðherra á framlögum sem veitt eru á grundvelli stefnumótandi byggðaáætlun fyrir árin 2022-2036

Frétt af vef innviðaráðuneytisins