Fréttir

Kampakátur hópur

Fimm styrkir voru veittir úr Byggðarannsóknasjóði á ársfundi Byggðastofnunar þann 28. maí á Kirkjubæjarklaustri. Styrkirnir eru fjármagnaðir af fjárlagalið byggðaáætlunar og með framlagi frá Byggðastofnun. Til úthlutunar voru 17,5 m.kr. Auglýsing um styrki til byggðarannsókna var birt 23. janúar með umsóknarfresti til 4. mars. Alls bárust 28 umsóknir.

Stjórn Byggðastofnunar ákvað að styrkja eftirfarandi fimm verkefni:

• Samfélagsáhrif menningar í landsbyggðum: Lífsánægja, félagsleg tengsl og búseta. Styrkupphæð: 3.800.000 kr. Styrkþegi er Listaháskóli Íslands, Þorbjörg Daphne Hall.
• Matvælaframleiðsla og staðbundin nýting: Kortlagning framleiðslu og svæðisbundinnar nýtingar á Austurlandi 2023-2025. Styrkupphæð: 3.400.000 kr. Styrkþegi er Austurbrú ses., Hrafnkatla Eiríksdóttir.
• Getur saga Flateyjar á Skjálfanda og Skála á Langanesi verið gagnleg brothættum byggðum nútímans?– Fortíð, nútíð og framtíð brothættra byggða. Styrkupphæð: 4.500.000 kr. Styrkþegi er Þekkingarnet Þingeyinga, Helena Eydís Ingólfsdóttir.
• Rural Tourism AI Workshop / Vinnustofa um gervigreind í ferðaþjónustu. Styrkupphæð: 2.400.000 kr. Styrkþegi er Gunnar Ólafsson, Magdalena Falter.
• Almyrkvi á sólu 2026: Stýring og samhæfing í dreifðum byggðum. Styrkupphæð: 3.400.000 kr. Styrkþegi er Rannsóknamiðstöð ferðamála, Vera Vilhjálmsdóttir.

Hér má sjá nánari upplýsingar um styrkt verkefni.

Byggðarannsóknasjóður hefur það að markmiði að veita styrki til rannsókna- og þróunarverkefna sem stuðlað geta að jákvæðri byggðaþróun og bætt þekkingargrunn sem nýtist við stefnumótun, áætlanagerð og aðgerðir á sviði byggðamála.