Fréttir

71. Fjórðungsþing Vestfirðinga fór fram á Patreksfirði í vikunni þar sem góð þátttaka og góður andi voru allsráðandi. Þar komu saman sveitarstjórnarfulltrúar af öllum Vestfjörðum, margir í fyrsta sinn, til að ræða framtíð landshlutans og helstu hagsmunamál. Byggðastofnun átti einnig tvo fulltrúa á þinginu.

Svæðisskipulag Vestfjarða var í brennidepli og tóku þingfulltrúar m.a. þátt í vinnustofum um forgangsröðun verkefna og innleiðingu skipulagsins. Þá kynnti starfsfólk Vestfjarðastofu fjölbreytta starfsemi sína og þjónustu við sveitarfélög, atvinnulíf og íbúa.

Á þinginu voru samþykktar 13 ályktanir um mikilvæg framfaramál, meðal annars bættar samgöngur, öflugri innviði, aukið orkuöryggi, fjarskipti, atvinnumál og skólaþjónustu. Hér má lesa allar ályktanir þingsins.

Sérstök stefnuályktun um Svæðisskipulag Vestfjarða undirstrikar mikilvægi samstöðu ríkis, sveitarfélaga og samstarfsaðila um áframhaldandi uppbyggingu.

Sameiginleg framtíðarsýn Vestfirðinga er skýr: Sjálfbærir, samkeppnishæfir og eftirsóknarverðir Vestfirðir þar sem samfélög og atvinnulíf blómstra.