Fréttir

Skýrsla um tekjur 2008-2025

Árið 2025 voru heildartekjur einstaklinga með lögheimili á Íslandi 3.099 milljarðar króna, 3,7% hærri en árið 2024, að teknu tilliti til verðlagsbreytinga. Atvinnutekjur voru 69% af öllum tekjum einstaklinga, lífeyrisgreiðslur 11%, fjármagnstekjur 11%, bætur frá TR og Sjúkratryggingum 7%, atvinnuleysisgreiðslur 1%, fæðingarorlofsgreiðslur 0,8%, fjárhagsaðstoð sveitarfélaga 0,2% og aðrar staðgreiðsluskyldar greiðslur 0,5%.

Þetta kemur meðal annars fram í nýrri skýrslu Byggðastofnunar, Tekjur einstaklinga eftir svæðum 2008-2025. Samhliða útgáfunni hefur samnefnt mælaborð verið uppfært, en þar er hægt að rýna enn frekar í niðurstöður. Gögnin í greiningunni koma frá Hagstofu Íslands.

Ferðaþjónusta með yfir 50% hlutdeild í tveimur sveitarfélögum

Heildaratvinnutekjur í einkennandi greinum ferðaþjónustu voru 238 milljarðar króna árið 2025 og hafa aldrei verið hærri. Atvinnutekjur í ferðaþjónustu samsvöruðu um 11% allra atvinnutekna landsmanna.

Vægi ferðaþjónustu er mjög mismunandi eftir svæðum. Hæst var hlutdeild hennar í Mýrdalshreppi, þar sem 57% atvinnutekna íbúa komu úr einkennandi greinum ferðaþjónustu árið 2025, og næsthæst í Skaftárhreppi, þar sem hlutdeildin var 52%.

Hlutdeild greinarinnar var jafnframt 40% í Bláskógabyggð, 38% í Eyja- og Miklaholtshreppi og 30% í Reykjanesbæ. Þá var hlutdeild ferðaþjónustu yfir 20% af heildaratvinnutekjum í Sveitarfélaginu Hornafirði, Þingeyjarsveit, Suðurnesjabæ og Rangárþingi eystra.

Atvinnutekjur jukust mest á Suðurlandi

Heildaratvinnutekjur námu 2.140 milljörðum króna árið 2025. Það eru um 5,5 milljónir á hvern íbúa landsins eða 10,1 milljón á hvern launþega.

Atvinnutekjur jukust í öllum landshlutum árið 2025 nema á Suðurnesjum, þar sem þær drógust saman um 0,8%. Mest jukust atvinnutekjur á Suðurlandi 6,8% og næstmest á Vesturlandi 4,9%. Atvinnutekjur á íbúa voru áfram hæstar á Austurlandi og höfuðborgarsvæðinu, eða 5,7 milljónir króna.

Mikill munur á hlutdeild atvinnugreina eftir landshlutum

Hlutdeild atvinnugreina í atvinnutekjum er töluvert ólík milli landshluta. Hlutdeild opinbera geirans var hæst á Norðurlandi vestra árið 2025, þar sem atvinnugreinar hans stóðu fyrir 40% heildaratvinnutekna, en lægst á Suðurnesjum 22%.

Framleiðsla án fiskvinnslu var hlutfallslega mikilvægust á Austurlandi og Vesturlandi, þar sem hún stóð fyrir 18% og 17% atvinnutekna. Fiskveiðar og fiskvinnsla voru hins vegar hlutfallslega mikilvægastar á Vestfjörðum, þar sem hlutdeild sjávarútvegs í heildaratvinnutekjum var 21%. Á Austurlandi var hlutdeildin 18% og á Vesturlandi 13%.

Hlutdeild flutninga og geymslu var langhæst á Suðurnesjum, eða 19% heildaratvinnutekna. Rekstur gisti- og veitingastaða var mikilvægastur á Suðurlandi, þar sem hlutdeild greinarinnar var 10%.