Fréttir

Vaxtarsamningur Norðausturlands var undirritaður á Húsavík 8. janúar sl.

Þetta er sjötti vaxtarsamningurinn sem iðnaðarráðuneytið undirritar og jafnframt sá fyrsti fyrir Norðausturland. Vaxtarsamningurinn er til þriggja ára og er framlag ríkisins, sem kemur af því fé sem ríkisstjórnin samþykkti að ráðstafa til mótvægisaðgerða vegna aflabrests í þorski, samtals um 90 milljónir króna. Samningurinn markar upphaf nýrrar kynslóðar vaxtarsamninga með því að hann er gerður við einn aðila, Atvinnuþróunarfélag Þingeyinga hf., og sér stjórn félagsins og heimamenn alfarið um framkvæmd hans. Starfssvæði Atvinnuþróunarfélagsins og vaxtarsamningsins nær frá Vaðlaheiði að Bakkafirði og eru íbúar á svæðinu um 5000 manns. Vegna ólíkra staðhátta og atvinnuskilyrað er stefnt að því að skilgreina svæðisbundna klasa þar sem lögð verður áhersla á að nýta styrkleika og styrkja veikar hliðar hvers svæðis um sig og hámarka þannig heildarstyrk landshlutans í atvinnulegu tilliti. Samstarf á milli svæða er lykilatriði í því sambandi.